Footer

Anak, pinaltogan ti amana

SAN JUAN, Ilocos Sur – Pinaltogan ti ama ti anakna gapu laeng iti riri iti alad iti nagbaetanda sadiay Barangay Nagsupotan ditoy nga ili idi aldaw ti Hulio 18.

Naiyospital ni Reynaldo Serna y Talla, 48, naasawaan, mannalon, gapu iti sugatna iti likud ti kannawan a tumengna kalpasan a pinaltogan ti amana a ni Rufino Serna y Bolando, 80, balo.

Sakbay ti insidente, kiniddaw ni Reynaldo a maikkat ti alad iti nagbaetan ti balayda ngem mapapati a di kayat ti lakay a nagtungpal iti panagsubang ken panangpaltogna iti anakna.

Naitaray ni Reynaldo iti Pira Hospital iti Cabugao para iti pannakaagas ti sugatna idinto a boluntario a simmuko ni Rufino kadagiti nagresponde a polis.

Insuko pay ti lakay ti Gauge 12 shotgun a nagmarka iti Armscor 12 GA. 3, Chamber Proof Tested model M30BG nga addaan serial number 1258856.

Lisensiado ti paltog ket agpasonto inton Pebrero 22, 2016.#