Footer

Masuspetsa a drug user, impulong ti kalib-inna, naaresto

TAGUDIN, Ilocos Sur – Nakapupok iti pagbaludan ti maysa a mapapati a drug user kalpasan a napatalgedan babaen ti drug test nga agar-aramat iti maiparparit nga agas, ken nagpositibo iti droga dagiti paraphernalia a nasukalan iti pagbasuraan iti asideg ti balayna sadiay Barangay Becques, ditoy nga ili itay nabiit.

Naipaima iti Bureau of Jail Management and Penology idi agarup 12:20 ti malem ti nadakamat nga aldaw ni Demonsthenes Christian Dauz y Almera, 27, residente iti Barangay Becques, kas maibatay iti commitment order a pinirmaan ni Judge Mario Anacleto Bañez ti RTC Branch 25, Tagudin, Ilocos Sur.

Naisaklang ni Dauz iti panagsalungasing iti Section 15 ti RA 9165 ket nai-docket ti kaso iti babaen ti NPS No. I-03-INQ-14G-00114 ken Criminal case No. 1368-T. Nairekomenda nga agpiansa iti P60,000.00 para iti temporario a pannakawayawayana.

Naaresto ni Dauz idi Hulio 13 kalpasan nga impulong ti kalib-inna a ni Maica Tomas y Ramirez, 26, ken residente iti Barangay Becques, a nakaduktal kadagiti ramit ti maiparparit a droga iti compost pit a masarakan iti asideg ti balayda a mapapati nga imbasura ti suspek.

Iti panagimbestiga dagiti nagresponde a polis nga indauluan ni DCOP Inpector Ramil Aquino Llarenas, ken babaen ti pannakikoordinar da Barangay Captain Joel Licudine ken Barangay Kagawad Alfred Lorenzana, nasukainanda dagiti drug paraphernalia iti pagbasuraan nga abut a pakairamanan ti pito a babassit ken stripped aluminum foil, 4 a naluktan a babassit a sachet, ken maysa a lighter a naikabil iti brown purse a binungon iti puraw a plastic bag.

Idi Hulio 14, naipan ni Dauz iti Crime Laboratory Office iti Candon City ket nagpositibo iti presensia ti methamphetamine ken THC-metabolites, agpada a dangerous drugs babaen ti Chemistry Report No. DT-023-2014.

Positibo met iti droga dagiti paraphernalia a naipaamiris iti Regional Crime Laboratory Office, Parian, San Fernando Office.#

Comments are closed.