Footer

Motorsiklo, dinadael ina ti menor de edad

BANTAY, Ilocos Sur – Dikayo makinobia iti menor de edad ta sakit ti ulo laeng ti sagrapenyo iti pannakirelasionyo kadakuada.
Leksion daytoy dagiti dua a construction worker gapu ta dinadael ti ina ti gayyemda a menor de edad ti motorsikloda.

Iti inbestigasion, naggiinom sadiay Barangay Puerto, San Ildefonso da Jerwin Regua y Pescador, Gildon Pescador y Regua, agpada a 19 ti tawenda, construction worker ken residente iti Barangay Malingeb, Bantay, ken dagiti nobiada a menor de edad, ket mapapati a nagkakalubbonda iti maymaysa a motorsiklo a naggawid.

Ngem naawanan iti gasolina ti motorsiklo ni Jerwin isu a mapapati a naginanada iti maysa a kalapaw agsipud ta nabartek ti nobiana.

Nagtext ti gayyem ni Gildon iti kakabagianna ket simmangpet dagitoy a nakalugan iti Yamaha RS tricycle.
Nagtaray da Jerwin ken Gildon ket imbatidan ti lugan.

Iti panagpapatangda iti sanguanan ti polis, inannugot ti ina ti gayyem ni Jerwin a dinadaelna ti motorsiklo gapu iti pungtotna a nakakita kadagiti babbaro a kadua ti anakna iti kalapaw.

Nagpadispensar ti baket ket inkarina nga ibaklayna ti mabusbos iti pannakatarimaan ti nadadael a motorsiklo ni Jerwin.#