Footer

Polis, nadesgrasia iti nauneg a kali

BANTAY, Ilocos Sur – Nagsagrap ti maysa a polis kadagiti dunor idi natnag ti motorsiklona iti nauneg a kali ti matrabtrabaho a kalsada sadiay Barangay Paing, ditoy nga ili idi malem ti Hulio 24.

Nupay kasta, rimmuar met laeng ni SPO3 Manuel Arreola y Aman, 42, naasawaan, kameng ti Santa police station, ken residente iti Barangay Paratong, Vigan City, iti Metro Vigan Cooperative Hospital a nakayospitalanna kalpasan ti pannakataming dagiti sugatna.

Naammuan iti inbestigasion nga agpalaud a direksion ni Arreola a nakasakay iti Euro GTX 150 a motorsiklona ket iti paset ti kalsada a matrabtrabaho, masabatna ti maysa a truck isu a nagpaamian a linia ngem natnag ti pilid ti luganna iti kali a puon ti nakaikrasanna iti kalsada.

Saan a nadakamat iti police blotter no asino ti nagmaneho iti truck a nakasinnabat ni Arreola.#