Footer

Tallo a kabusor ti ayat

Salaysay ni Jose Edwin S. Sajonia

DUA TI KADADAKSAN a pakabuklan ti kinadakes ditoy lubong, segun iti maysa a nalatak a pilosopo: “gura” ken “kinakurapay”. Uray ungpotem a basaen ti Nasantuan a Kasuratan ket dagitoy dagiti kangrunaan a makaigapu a nangiremrem ken nangikalang kadagiti immuna a kaputotan ti tao/henerasion: kalatakan ti panangpatay ni Cain ken ni Abel a kabsatna!

Dagiti naglatak a kabusor ti ayat

1. Osama Bin Laden – Nagtaud isuna iti bilionario a pamilia iti Saudi Arabia. Maysa a Yemeni. Adu a kurso ti inadalna. Nasaksianna ti pannakailidding ti kapulianna a Muslim iti Middle East ken iti napasamak a nadara a gubat idiay Lebanon! Pinabasolna dagiti Kano ken Israeli a nangduprak kadagiti pasdek dayta a nasion a nakairissingan ti adu a biag dagiti kadaraanna!

Gapu iti napalaus a gurana ket insaknapna ti Al-Qaeda nga organisasion a nabansagan a “terror” iti Middle East countries sa nagramaram iti Europa, Asia maigapu iti naruay a gamatna. Grabe ti panagbanat dagitoy ta alegasion a nakaam-ames dagiti parnuayenda a pananggudas iti biag iti ummong ti tao a pakairamanan dagiti inosente a sibilian kas iti panagbomba, panagmasaker, panag-hostage ken iti panag-hijack!

Kadamsakan pay laeng iti pakasaritaan ti lubong iti panang-hijack-da iti uppat nga eroplano a nangdugpak iti Twin Towers ti World Trade Center ti Amerika a nakaipatlian ti rinibu a biag dagiti Amerikano!

No saanna koma a pinalaluan ti gimmurgura, saan koma a napasamak dagitoy. Nupay kasta, bimmales met ni Kano ket insayankatna ti panangpadsona ken ni Osama Bin Laden idiay Abbotabad, Pakistan!

2. Saddam Hussein – Maysa a “self-made” man ni Saddam ket gapu iti wido ken turedna, in-inut a nagpangato agingga a nagbalin a pangulo ti pagilian ti Iraq. Gapu ta dina kayat nga ibbatan ti iggemna a turay, kinalatak ken nam-ay iti biag, nagabuso iti panagtakemna. Gimmurgura dagiti kailianna ket napasamak ti nadara a gerra sibil iti uneg ti pagilianna. Gapu iti gura ken ungetna ket kayatna nga ikisap dagiti kabusorna babaen iti nuklear nga armas wenno makasabidong a gas – pinadasda ket naustel ti adu a sibilian a mangkonkontra kenkuana!

Gapu iti internasional a panangkondenar ket dinusada ti gobiernona babaen iti economic embargo manipud iti Nagkaykaysa a Nasion (United Nations). Dina inggingina ngem dimteng ti pannakaipasulina ket natiliw isuna. Nausig isuna babaen iti War Crime Tribunal ti pagilian ti Iraq. Gapu iti kadagsen ti basolna ket nabitay babaen iti pannakaibitinna! Adda sayangguseng a kaykayatna koma ti ma-firing squad ta nadaydayaw ngem awan ti nangkanunong iti maudi a kiddawna. Gapu iti nakaro a panagabusona ket nagballatek met la kenkuana ti babakna!

3. Col. Moammar Gaddafi – Maysa a Bedouin, agpaspastor iti ayup iti disierto – dina imbain daytoy iti panagdakkelna. Adda siribna isu a nakasisip iti adal ken padas a nangital-o iti kinataona. Idi madanonna ti pantok ti pagduyosanna, indauluanna ti panagalsa maikontra iti turay ni King Idris ti Libya. Isu ti naipangruna iti grupoda a coup plotters! Idi nagbalinen a naan-anay a pangulo, binaliwanna ti sistema ti pannakaidaulo dagiti kailianna babaen iti Third Universal Theory a makunkuna. Sentralisado ti pannakakontrol ti turay ken pannakagamulo ti sanikua ti estado.

Gapu iti pannakabartekna iti bileg ta 42 a tawen nga iniggamanna ti rienda ti turay, nagabuso ken kinaritna ti sangalubongan nga ekker ti demokrasia a nasnasion a di mangkampiar kenkuana. Kasla awanen ti makaanawa kaniana. Gapu iti gurgurana kadagiti tao a “Hudio” wenno masasao a Semitic Race – inrurumenna dagita a puli iti pagilianna. Napasamak ti nadara a civil war ken kinampiaran ti NATO ti Transitional National Council a nangbukel iti lumablaban a grupo.

Babaen iti sopistikado nga armas ti Britania, naaramid ti aerial strike ket naparalisa ti konboyna nga aglibas koma manipud iti kabesera ti Libya. Natiliw ni Col. Gaddafi ket nainsulto ta nagtaud iti minoridad a puli iti pagilianna ti nangpapatay kenkuana agraman ti anakna a lalaki ken iti makanawanna nga opisial ti gobiernona.

Dagitoy ket napasamak maigapu iti gura ken kinakurapay! Adu ti nairamraman! Dakkel a kontrobersia ti pinataudna. No ar-arigen, dinegdeganna ti panagkokontra dagiti nadumaduma a puli iti lubong – banag a saan nga ipalubos a mapasamak ti United Nations ken dagiti demokratiko a dadakkel a nasion a pakaibilangan ti Estado ti Amerika a mapasamak.

Ditay koma tultuladen daytoy. Tumulongtayo ketdi a mangpakappia ti lubongtayo babaen iti panangmantenertayo iti rikna iti ayat iti bagi, aglawlaw, pada a tao ken iti Namarsua. Agbalintayo koma nga instrumento iti kappia, ayat ken progreso – saan a kinapanglaw! #

 

 

Comments are closed.