Footer

4 sabali pay drug pushers, nanabtuog iti drug bust operations

VIGAN CITY – Uppat manen a mapapati a drug pushers a nanabtuog iti drug buy-bust operations ti nakasuan iti panaglabsing iti RA 9165 itay lawasna.

Napilaan iti provincial prosecutors’s office iti kaso a panaglabsing iti Section 5, 11, ken 12 ti Article II ti RA 9165 da Chester Claudio y Macapagal, 37, naasawaan, ken residente iti Barangay VII, Vigan City ken Mark Anthony Cochay Nido, 28, baro, ken residente iti Barangay IX, Vigan City; ken da iti Allan Rey Rosales y Robino, 34, baro, mekaniko, ken ti kalib-inna a ni Leslie Defante y Bejasa, 27, agpada a residente iti Barangay San Julian, Magsingal, Ilocos Sur.

Sakbayna, idi Septiembre 1, pinakatan dagiti operatiba a pakaibilangan ti Vigan City police station, PDEA ISET01, PIB ken PAIDSOTG Ilocos Sur da Claudio ken Cuchay iti buy-bust operation sadiay Gov. E. Reyes St., Barangay V, Vigan City idinto a sabali a drug operation ti inwayat ti grupo a pakaibilangan da PSI Andrew Rabang,m PAIDSOTIG, PIB Ilocos Sur PPO ken PDEA ISSET maikontra kada Rosales ken Defante iti Barangay Balaleng Laudenia, Bantay, Ilocos Sur.

Iti operasion iti Vigan City, maysa a polis ti nagpammarang a poseur-buyer ket gimmatang iti dua a plastic sachet ti maiparparit a droga a mapapati a shabu ken ni Claudio.

Apaman a naginnallawat ti polis ken da Claudio, dinagdagus dagiti operatibo nga inaresto dagiti suspek.

Nakumpiska dagiti polis iti ikut ni Cochay iti dua nga small heat sealed plastic sachet a naglaon iti mapapati a shabu, sabali pay a 20 a transparent sachets a naglaon iti mapapati a shabu, P1,000.00, maysa a vial a naglaon iti likido, improvised glass tooter, disposable lighter, 2 improvised scoop ken clip a maaramat para repacking ken maysa a roll foil.

Naiwayat ti buy bust operation maikontra ka Rosales ken Defante iti Farm View Inn sadiay Barangay Balaleng Laudenia, Bantay, Ilocos Sur a nagresulta iti pannakakumpiska dagiti operatiba iti ikut dagiti dua ti tallo nga small heat sealed plastic sachet a naglaon iti mapapati a shabu, drug paraphernalia a pakairamanan ti portable gas torch, 2 a lighter, maysa a crumpled aluminum foil, maysa a rolled aluminum foil, maysa a pakete ti plastic bags, 2 a water pipes, 2 a glass tooters, ken maysa a P1,000.00 a naaramat a buy-bust money.

Idi maudi a lawas ti bulan ti Agosto, nagsasaganad ti buy-bust ken search operations nga insayangkat ti kapolisan kas paset ti naing-inget a kampaniana maikontra iti panagraira ti maiparparit a droga.#