Footer

Dagiti Itta a Mangdadael iti Imahe ti Simbaan

Ni Tatang Lakay
(Umuna a paset)

NAGSAGRAP itay nabiit ti maysa a padi gapu iti panangpabainna iti maysa a 17-ti-tawenna a babai bayat ti pannakabuniag ti anak daytoy iti maysa a simbaan sadiay Mandaue City.

Nagallaallatiw iti social media ti panangbassawang daytoy a padi iti babai maigapu ta ti pabuniaganna nga anakna ket timmao nga awan ti lehitimo nga amana.

Ti makadakes, pinabainanna ti single mother iti sanguanan dagiti sangailina ken dagiti timmabuno iti pannakabuniag ti anakna.

“Nalawlawagan” met laeng ti nakullaapan a panunot ti padi ket dimmawat iti pammakawan iti single mother a pinabainanna.

Pagyamanan ta inawat ti babai ti panagpakawan ti padi.

Kas nakunana, kasla naikkat ti buttuon iti barukongna iti panangpakawanna iti padi a nangpabain kenkuana.

Mismo a ni Papa Francis ti nagkuna: Naaddaan dagiti nagannak kadakayo iti anak a lalaki wenno babai a mabuniagan, ngem iti sumagmamano a tawen, isudanto met ti maaddaan iti anak a mabuniagan, wenno apo…. Ket agtultuloy ti kadena ti pammati.”

Ngem saantayo a kas ken ni Papa Francis nga ingget darisay ti panagpuspusona ken ingget lawa ti pannakaawatna. Ordinariotayo laeng a tattao a saan a makaawat no ania ti pamkuatan ti maysa a pasurot ti Simbaan a mangpabain iti maysa nga ina gapu laeng ta awan ti ama ti ubing a pabuniaganna.

Iti biangtayo, saantayo a mapnek iti kasla pitik laeng iti lapayag a naipaay iti daytoy abusado a padi. Saantayo a mapnek iti arig arasaas laeng a timek ti Simbaan iti panangballakadna iti nakabasol a padi.

Adda pay ketdi panagduaduami iti panagpakawan ti padi. Dakkel ti suspetsami nga inaramidna laeng dayta agsipud iti kabara dagiti pammabalaw a naibato kenkuana gapu iti saan a makatao ken di maiparbeng nga inaramidna iti maysa a parsua a nupay nailaw-an a nagayat iti lalaki a dina maitakderan ti inaramidna, saan a napukaw ti panagtalekna iti Dios ket pinabuniaganna ti anakna tapno agbalin a kristiano ken nasayaat nga umili iti masakbayan.

Kadakami, saan a nadarisay ti panagpakawan ti padi, napilpilit laeng a nagpakawan gapu ta rimkuas dagiti timek a nangbabalaw iti inaramidna.

Kas kadagiti dadduma a di napnek iti panagpakawan ti padi, ad-adda a umayonkami iti pannakadisiplina daytoy agsipud iti saan a maiparbeng nga inaramidna, kas maysa a parsua a kinawesan ti Simbaan a mangirakurak kadagiti pannursuro ni Hesus.

Kadagitoy a panawen, saan a mailibak nga adun dagiti pasurot ti Simbaan ti nayaw-awan iti pampanurnorenda a dalan. Imbes a ti nalinteg dalan ti surotenda, kas iti “matuwid na daan” ni Presidente Benigno Aquino III, ti ketdi pagkurbaan wenno iti paglintegan ti pagdaliasatanda agsipud ta napalanas ti pagnaanda, saan a kas iti dalan dagiti pudpudno a misionario a kibbakibbakol ken namirit kadagiti siit a mangpuris iti dapanda ken mangipalay iti ut-ot ken saem.

Umat-attidog ti listaan dagiti disipulo ti Dios a simmiasi iti dalan. Kas daydi eskandalo a nakainbolbaran ti dua a nangato ti saadna a padi. Ti maysa ket naibutaktak nga adda dua a putotna; ti ina dagiti ubbing ket maysa kadagiti tumultulong kadagiti aktibidad ti Simbaan. Ti sabali ket impulong ti sekretariana iti sexual harassment. Pinaglibakan iti naud-udi ti pammabasol ti mapapati a biktima. Nabara daytoy nga eskandalo ta dimmanon pay iti imatang ti Vatican a nangisayangkat iti panagimbestigana.

“Ita, itudotayo manen ti agpabpabasol a ramay iti bagitayo. Agsagsagaba iti nakaro a leddaang ti intero a Simbaan ti Pilipinas kabayatan a maisebba iti beggang ti integridadna kadagiti kaso ti aktual wenno mapapati a dakes nga aramid a seksual ti sumagmamano kadagiti pastorna,” reaksion ti Catholic Bishops Conference of the Philippines (CBCP) iti pastoral a suratna.

“Gapu kadagitoy, iyebkasmi ti ladingitmi ken dumawatkami iti pammakawan manipud iti Mannakabalin, kasta met kadagiti tattao,” innayonna.

Adda pay am-ammomi a padi (ubingkami pay idi) a naglabus iti abitona agsipud ta adda nasikoganna a kadkaduana iti simbaan. Damagmi idi a nagtipon dagiti dua ket pimmanawda iti lugarmi tapno maiyadayoda iti manidsidir a mata ti kagimongan.

(Adda tuloyna)

 

Comments are closed.