Footer

Uppat nga Aldaw, Tallo a Rabii

Ababa a Nobela ni Salvador A. Espejo
(Maika-25 a paset)
“Naisalakankan,” kinuna ni Margret idinto a piniselna ti dakulap ni Randolf. “Ay, wen gayam, ni Sargeant Luke Meneses, intel operative ti Narcotics Division.”

“Hello, Marco,” kinuna ni Randolf.
“Sori, Randolf,” immisem iti bangbangir ni Meneses. “Paset ti trabahomi ti manglimlimo no dadduma.”

Saan a simmungbat ni Randolf. Pinagsinnublatna ketdi a minatmatan da Marco ken ni Margret, kasla kayatna a lansaden iti rupa dagitoy dagiti saludsod a dina maibirokan iti sungbat.

Naammuan ni Randolf idi agangay a dua a grupo dagiti nangsipsiput iti tignayda ken ni Margret sipud pay idi dimmap-awda iti Callao a pagtataripnongan dagiti mannurat: ti grupo da Meneses ken ti nagkadua a grupo ni Ka Martin alias Fernando Aminado ken ti Amasona a ni Ka Anselma.

Ti grupo ni Ka Anselma ti nakaipabaklayan ti responsibilidad a mangammo iti kontak ni Margret ken nangiwayat iti pannakatakaw ti bagna iti Nikolai Inn ken iti pannakaparnuay iti “uram iti nasao nga otel tapno kasla bunar a makiwar dagiti nagtsek-in iti otel ket mapilitda nga umakar.

Ti grupo met ni Ka Martin ti back-up iti grupo ni Ka Anselma ken nangsurot kadakuada manipud iti Nikolai Inn agingga iti otel a nagpaknianda. Pasurot ni Ka Martin ti nagpammarang a serbidor a nangiyuneg iti red wine a nalaokan iti pagpaturog.

“Kasano nga ammoyo dagitoy?” sinaludsod ni Randolf nupay adda pamalpalatpatanna iti sungbat daytoy.

“Addakam’ iti intel, ket iti maysa a mission a kas itoy, kas iti chess, kasapulan nga ammomi ti sumaruno nga addang dagiti kabusor tapno masaganaanmi,” kinuna ni Meneses.

“Ngem masirib dagiti kabusor, dandani namaysaandakami,” intuloy ni Sgt. Meneses. “Nupay ninamnamak nga adda mangsurot kadakayo iti ipapanyo iti sabali nga otel, adda pay gayam sabali a grupoda a pinagbantayda iti asideg ti otel a nangiyaw-awan kadakami.”

“Isu met la a medio naladaw ti yaarayatyo,” kinuna ni Randolf. “Kasano a napakaammuam da Sgt. Meneses a nagballigi dagiti kabusor a nangserrek iti kuartota?” sinaludsod ni Randolf idinto a tinaliawna ni Margret.

Kinuna ni Margret nga idi naamirisna a napainum iti pagpaturog, dagusna a tinalmegan ti selponna. Nakadirekta gayam a kumontak ti selponna iti selpon ni Sgt. Marco ta adda naited kenkuana nga emergency number a talmeganna no kasapulanna ti arayat.

Inlawlawag ni Margret a sabali pay a tracking device, kas kadakkel ti butones, ti saggaysa nga inkabil ni Sgt. Meneses iti batog ti barukongna ken iti bagna. Dagitoy ti nangipatuldo kada Marco iti otel a dimmagasanda kalpasan ti artipisial nga uram a pinarnuay ti grupo ni Ka Anselma iti Nikolai Inn.

“Idi makapuotak, addaakon iti sabali a kuarto iti otel,” kinuna ni Margret. “Naammuak idi agangay a nagsinata a pinalutpot ti grupo da Ka Aminado ken Ka Anselma.

Nagtung-ed ni Randolf.

“Inusisadak ti grupo mainaig iti surat a naipaw-it kaniak. Saankon nga inlibak nga adda iti ikutko. Intedko ti surat. Ngem dida patien ti linaonna. Suspetsada a nasuktanen daytoy iti sabali. Ti dida ammo, nalimed nga intedko ti surat ken ni Sgt. Meneses bayat ti kaaddata iti uneg ti kueba. Saanko nga inyawat iti igid ti karayan ta amkek nga adda dagiti mangsipsiput kadakami.”

Saan a nagtimek ni Randolf. Panangipagarupna idi ket palpaliiwen ida ni Marco wenno Sgt. Meneses ket nalimed a simmurot iti ipapanda iti uneg ti Callao Caves. Nagbiddut gayam iti panangipapanna. Iti uneg ti kueba ti panangiyallatiw gayam ni Margret iti surat ken ni Sgt. Meneses tapno amirisen ti intel no ania ti linaonna a mensahe. Posible nga adda tiempo bayat ti kaaddada iti uneg a nalimed nga impaima ni Margret ti surat. Adda la ketdi pre-arranged a lugar a nangibatian ni Margret iti surat a pangpidutan ni Sgt. Meneses. Posible nga iti altar. Malagipna itan a pagbiit a napan nagmattider ni Margret iti sango ti altar.

“No kasta ni Sgt. Meneses ti kontakmo,” nakuna ni Randolf. “Red herring laeng ni Janette Amargo?”

“Saan a red herring ni Amargo. Kinaagpaysona, nagrehistro a kas delegado iti konbension. Napakdaaranda iti isasangpetko. Ammoda nga adda iti ikutko ti surat a nakaipalaonan ti code no ania a petsa ken lugar ti pannakaisanglad dagiti maipuslit a kargamento. Ammoda met nga adda komuntak kaniak. Kayatda a lapdan ti pannakaipaima ti surat iti kontak agsipud ta madadael ti operasion. Ngem ti dida ammo ket ammomin ti kinasiasino ni Amargo. Dayta ti gapuna a Janette Amargo ti nakanagan iti rabaw ti sobre. Tapno maballaagannak ken tapno ma-neutralize daytoy,” kinuna ni Margret.

Naaprosan ni Randolf ti pangersangen a timidna. Saan ngarud a nagbiddut iti panangipapanna. Ni Janette Amargo ti babai a nakisinnarak iti lalaki iti kabakiran. Ni la ketdi Fernando Aminado alias Ka Martin ti kinasinnarakna!
(Maigibusto)