Footer

World Heritage Cities Solidarity Day, selebraran ti Vigan

VIGAN CITY – Selebraran ti Vigan ti World Heritage Cities Solidarity Day inton Septiembre 8 a dakkel ti namnama dagiti agtuturay ditoy nga idauluan ni Mayor Eva Marie S. Medina a makalusot ti siudad iti nabatbati pay nga stage tapno mairaman iti New7Wonders Cities of the World.

Nangrugi a selebraran ti Vigan ti World Heritage Cities Solidarity Day kalpasan nga inlista ti UNESCO a maysa kadagiti heritage sites iti sangalubongan idi Disiembre 2, 1999.

Dagiti siudad a mailista a UNESCO World Heritage Sites ket agbalinda a sanikua ti sangalubongan a masalimetmetan, makonserba, mapreserba ken maisalakan uray iti panawen ti didigra, kalamidad wenno gubat.

Itay Septiembre 4, nangrugi ti selebrasion babaen iti seremonia a naangay iti Plaza Burgos ken pannakalukat dagiti exhibit dagiti daan a retrato ken paintings kasta met iti Historia Oral a panangammo dagiti sangsangaili ken turista iti historia, kultura ken inaldaw-aldaw a panagbiag dagiti umili iti Vigan, kas insalaysay dagiti lallakay ken babbaket.

Itay Septiembre 5, naipabuya nadumaduma a sala kas iti folk dance, Latin ken dance sports idinto nga idi Septiembre 6, naangay ti nangayed a parada a napanaganan Repazzo de Vigan, a pannakaiparang ti kabibiag dagiti taga-Vigan manipud idi sinakup ida dagiti Kastila, Amerikano, ken Hapon idi tiempo ti Maikadua a Gubat ti Lubong, ti panaglupos ti Vigan manipud iti maysa nga ordinario nga ili agingga iti nagbalin a siudad a maibilangen iti agdama a maysa kadagiti kangrunaan tourist destinations iti Amianan a Luzon.

Ita a masursurat daytoy, Septiembre 7, maangay ti Kinnantaan, vocal solo, duet ken chorus kasta met ti panagsapata dagiti day care students, parents’ guild ken federated day care workers’ association.

Iti kaaldawan ti selebrasion, Septiembr 8, maysa a misa ti maangay iti nadaeg a Simbaan ni San Pablo a sarunuen ti panagkari manen dagiti agtuturay, empleado, dagiti hepe ti nadumaduma nga ahensia, ken dagiti umili iti panangsaluad, panangipateg ken panangilalada iti Vigan kas maysa a heritage city. Sumaruno ti solidarity breakfest a maangay iti Plaza Burgos.

Mabirbirngasan nga Intramuros of the North, ti Vigan City ti pakasarakan kadagiti duog a balay a bato a nagatep iti teha a nabangon pay idi tiempo dagiti Kastila, ngem agingga ita ket agkinkinnamayet a sinalsaluadan ken kinukupkopikan dagiti umili ken agtuturay ti Vigan.

Karaman ti Vigan kadagiti 21 a finalist para iti New7Wonders Cities of the World a naiwaragawag idi Hulio 7 daytoy a tawen.

Manipud iti daytoy a bilang, inton Oktubre 7, mapili babaen iti panagbubutos iti internet ken panagtext ti 14 finalist para iti New7Wonders Cities of the World.

Inton Disiembre 7, 2014, maiwaragawagton dagiti mapili a baro a pito a pagsidsiddaawan a siudad iti sangalubongan.#

Comments are closed.