Footer

2 mangngagab, di nakalusot iti dragnet operation

CERVANTES, Ilocos Sur – Dua a lalaki ti napilaan iti kaso a panaglabsing iti RA 533 wenno Anti Cattle Rustling Law babaen iti inquest proceedings iti provincial state prosecutor’s office, Candon City itay Septiembre 7, 2014.

Sakbayna, nangisayangkat dagiti polis-Cervantes iti dragnet operation iti Cervantes-Quirino Raoad, partikular iti Barangay Concepcion, Cervantes idi agarup 10:00 ti rabii ti Septiembre 5 kalpasan a nakaawatda iti mensahe manipud iti polis-Quirino nga adda maysa a Delica van a nagkarga iti mapapati a natakaw a baka nga agturong iti Cervantes.

Idi agarup 10:00 ti rabii ti nadakamat nga aldaw, simmungad ti van a nagluganan da Romando Vilog y Inamag, 35, naasawaan, residente iti Barangay Namitmit, Quirino, Ilocos Sur, ken ni Valentin Ramirez y Antonio, 50, naasawaan, ken residente iti Barangay Rosario, Cervantes, Ilocos Sur ket dagus a pinasardeng dagiti polis para iti pannakasukimat ti kargana.

Dua a dadakkel a baka ti nasukalanda a karga ti van.

Inaresto dagiti polis dagiti suspek idi awan ti naiparangda a dokumento iti panagtagikuada kadagiti baka, kasta met iti pannakaibiahe dagiti animal.

Naipan dagiti suspek, agraman ti luganda iti police station para iti naing-inget pay a pannakaimbestigada.

Iti pannakaisurat daytoy, di pay ammo no asino ti pudpudno nga akinkukua kadagiti natakaw a baka.#