Footer

2 nanabtuog iti search, buy-bust operations

STA. MARIA, Ilocos Sur – Dua nga operasion ti insayangkat ti kapolisan ditoy ken Burgos a nagresulta iti pannnakatiliw ti dua a mapapati a drug pusher idi Septiembre 9.

Inaresto ti nagtitipon nga elemento ti Sta. Maria police station, PAIDSOTG KEN PDEA Ilocos Sector Special Enforcement Team (ISSET) nga indauluan ni IO1 Dexter Regaspi ni John Harvey D. Dar, 20, baro, ken residente iti Barangay Nagtupacan, kalpasan a nagpositibo ti insayangkatda a search operation iti balay daytoy idi agarup 6:30 ti bigat ti nadakamat a petsa.

Awan a presente ni Roberto B. Dar, ama ni John Harvey, a puntiria pay iti search operation idi nagsukisok dagiti polis iti balay dagiti suspek.

Iti panagsukisok nga insayangkatda babaen ti bileg ti search warrant nga inyisio ni Judge Sixto Diompoc ti RTC Branch 72, ken inimatangan dagiti barangay official, nakakumpiska dagiti operatiba iti uppat a babassit a heat sealed plastic sachet a nagkarga iti mapapati a shabu.

Segun iti polis, sumagmamano nga impormasion ti naawatda manipud iti barangay intelligence network (BIN) nga agiwaywayat dagiti Roberto B. Dar, ken ti anakna a ni John Harvey iti illegal nga aktibidad iti droga ket idi nakumpirmada a positibo ti report, insayangkatdan ti panagsukisok.

Kabayatanna, droga ken kuarta a pakairamanan ti drug money ti nakumpiska dagiti operatiba iti buy-bust operation nga insayangkatda sadiay Barangay Luna, Burgos maikontra ken ni Jacky James Superio y Banta, 28, naasawaan, ken residente iti Barangay Namalangan, Santa, Ilocos Sur.

Maysa a polis ti nagpammarang a poseur-buyer ket apaman a nakagatang iti maysa a heat sealed plastic sachet a nagkarga iti mapapati a shabu, dagus a nagkuti dagiti agur-uray nga operatiba a nanggamat ken ni Superio.

Nakakumpiska pay dagiti polis iti ikut ni Superio iti uppat pay a plastic sachet a nagkarga met laeng iti mapapati a shabu nga agdagsen iti sumurok-kumurang 1.1 grams, maysa a sachet nga addaan residue, nausar ken saan a nausar nga aluminum foil, cellular phone, charge, ken kuarta iti nadumaduma a denominasion nga agdagup iti P437.00 ken ti marked money a P500.00.

Iti pannakaisurat daytoy, naipilan iti prosecutor’s office babaen ti inquest proceeding ti kaso a panaglabsing iti Section 5 ti RA 9165 maikontra ken ni Superio.#

Comments are closed.