Footer

3 lugan nainbolbar iti aksidente

CABUGAO, Ilocos Sur – Saanen a naidanon ti biag ti maysa a motorista kalpasan a nainbolbar ti luganna iti aksidente iti national highway a sakup ti Barangay Sagayaden ditoy nga ili idi malem ti Septiembre 7.

Naideklara a dead on arrival iti Pira Clinic and Hospital a nakaitarayanna kalpasan ti aksidente ni Elmer Ragon y Silvania, 63, nasawaan ken residente iti Barangay Cabigbigaan, Sto. Domingo, Ilocos Sur gapu kadagiti grabe a sugatna iti ulo ken nadumaduma a paset ti bagina maigapu iti aksidente a nakainbolbaran ti motorsiklona a Euro 110 ken maysa a Ford Everest ken Montero Sport.

Nagsagrap met kadagiti sugat iti ulona ken garadgad iti dadduma a paset ti bagina ni Tricia Kate Tobias y Ragon, 8, ken residente iti Barangay Cuancabal, Cabugao, Ilocos Sur ket naipaagas nga immuna iti Pira Clinic and Hospital sa naiyalis iti Gabriela Silang General Hospital.

Saan a naan-ano ti drayber ti Ford Everest a ni Edmund Mayubay y Idica, 32, naasawaan, ken residente iti Barangay 4B Aring, Badoc, Ilocos Norte, ken ti drayber ti Montero Sport a ni Romeo Visaya y Tangonan, 43, baro, ken residente iti U2l9 Lovina Bldg. East Raya Mercedez, Pasig City.

Segun iti panagimbestiga dagiti polis, agpaamianan ti Euro 110 a minaneho ni Ragon ngem idi agdaldaliasaten iti kalsada a sakup ti Barangay Sagayaden, mapapati a kimmaut iti bangir a linia a nakagapu iti pannakasapgid ti luganna iti Ford Everest a kasabatna iti dayta a kanito.

Gapu iti daytoy, saan a nakontrol ni Ragon ti manibela ti motorsiklo ket naipayasyas ti lugan iti tengnga ti kalsada ket inatalan ti sumarsaruno a Montero Sport a puon ti nakadundunoran ti ulo ken nadumaduma a paset ti bagi ti biktima.

Kabayatanna, pimmusay ti biktima ti aksidente maysa anga aldaw kalpasan a dinungpar ti kotse iti national highway a sakup ti Barangay Bahet, San Ildefonso idi Septiembre 7.

Iti report ti polis ditoy, pimmusay ni Domingo Rapin y Ramos, 75, ken residente iti nadakamat a barangay maigapu iti aksidente a panangdungpar kenkuana ti Toyota Corolla a minaneho ni Arnel Adora y Benigno, 51, naasawaan, ken residente iti Barangay VII, Vigan City idi agarup 9:30 ti bigat ti Septiembre 7.

Naammuan iti polis a mapapati a kellaat a nagballasiw ti lakay iti bighway ket saan a nakontrol ti drayber ti manibela a puon ti pannakadungparna iti biktima.

Naitaray ti biktima iti Metro Vigan Cooperative Hospital, Bantay para iti pannakaagas dagiti nakaro a sugatna iti nadumaduma a paset ti bagina.

Iti kaudian a report, kalpasan a nagpapatang ti pamilia ti biktima ken ti drayber ti kotse a nakadungpar kenkuana, nagkikinnaawatanda a saanen nga umabot ti kaso iti korte.#