Footer

BANNER NEWS: Maparti a baboy iti slaughterhouse ti Vigan City, di apektado panagpababa ti presio ti karne ti baboy

VIGAN CITY – Nagtalinaed ti bilang dagiti maparti a baboy ditoy siudad iti baet a bimmaba ti presio ti karne ti baboy a mailako iti tiendaan publiko, kinuna ti slaughterhouse masters itay nabiit.

Kinuna ni Vigan City Slaughtermaster Dr. Arnulfo Quitoriano a saan a bimmassit ti bilang dagiti maparti a baboy iti slaughterhouse, kas napagamkan a mapasamak iti pannakaibaba ti presio ti karne ti baboy a mailako iti tiendaan ti Vigan.

Kinuna ni Quitoriano a kas iti napalabas, nagtalinaed ti aganay 60 a maparti a baboy iti slaughterhouse iti inaldaw-aldaw.

Segun ken ni Quitoriano, umab-abot iti P115 kada kilo ti presio ti liveweight nga agdagsen iti nasursurok ngem 100 kilos. Nababbaba ti presio ti liveweight a baboy nga agdagsen iti nakurang a 100 kilos.

Imbaba dagiti meat vendors ti presio ti karne ti baboy a mailako iti tiendaan publiko ditoy iti sanguanan ti panagpababa ti presio ti liveweight ken iti ibaballaet ti sangguniang panlungsod ditoy mainaig iti daytoy isyo.

Insubli dagiti meat vendors ti presio ti karne ti baboy iti P170.00 kada kilo manipud iti P180.00 kada kilo kas panagtungpal iti linaon ti memorandum of agreement a nagpinnirmaanda iti sangguniang panlungsod idi bulan ti Abril daytoy a tawen.

Pinatgan idi ti sangguniang panlungsod ditoy ti petision dagiti meat vendors a maingato ti presio ti karne ti baboy nga ilakoda iti tiendaan publiko iti P180.00 kada kilo manipud iti P170.00 kada kilo kalpasan a nagkari dagiti meat vendors nga isublida nga ibaba ti presio ti karne ti baboy iti kanito a lumaka dagiti gatangenda a liveweight.

Kas sinaguday ti MOA a pinirmaan dagiti meat vendors, iti kanito a bumaba ti presio ti liveweight a baboy iti P120 ken agpababa kada kilo, ibaba met dagiti meat vendors ti presio ti karne ti baboy iti P170 kada kilo.

Sakbayna, nagpetision dagiti meat vendors a maingato ti presio ti karne ti baboy agsipud ta kunada a maluglugida gapu iti nangina a panaggatangda iti liveweight nga agtartaray iti P125-127 kada kilo.

Immun-una ngem daytoy, babaen ti privilege speech, linagidaw ni Konsehal George Villanueva ti panaglaok dagiti karne ti baboy nga addaan tulang ken puro lasag a mailaklako iti tiendaan publiko ti Vigan.

Ngem alegasion dagiti meat vendors a no dida paglaoken dagiti lakoda a karne nga addaan tulang ken lasag, agpukawda iti presio a P170 kada kilo agsipud ta ngimmina ti presio ti gatangenda a liveweight a baboy.

Kinuna dagiti meat vendors a manipud iti P120 agingga iti P127.00 ti presio ti liveweight a baboy ket saandan a maparuar no saanda nga ilaok dagiti karne nga adda tulangna kadagiti puro lasag.

Ngem nagpaparti ni Konsehal Benjo Verzosa, chairman ti committee on market, ket natakuatan nga iti presio a P170 kada kilo iti baboy a liveweight a nagatang iti P115 kada kilo, agganansia pay laeng dagiti aglaklako iti P1,500.00; no mailakoda iti P180 kada kilo, agganansiada iti P2,400.00 ket iti P190 kada kilo, agganansiada iti P3,276.00.

Kinuna ni Verzosa a no magatang ti liveweight a baboy iti P120 ket mailakoda iti P170 kada kilo, agganansia dagiti meat vendors iti P1,100.00; no mailakoda iti P180 kada kilo, aggansiada iti P1,948.00; ket no P190 kada kilo, P2,796.00.

Innayon ti konsehal a no nagatang ti liveweight iti P125.00 kada kilo ket mailakoda iti P170 kada kilo, agganansia pay laeng dagiti meat vendors iti P620.00; no P180 ti pakailakuanda kada kilo, agganansiada iti P1,465.00 ket no P190 kada kilo, agganansiada iti P2,316.00.

Kinuna ni Verzosa a maysa met a negosiante, a nasurok laeng a P699.60 ti suma total ti expenses dagiti meat vendors manipud iti pannakaparti ti baboy agingga iti pannakaipanna iti tiendaan tapno mailako.

Kanaig daytoy, nangiparuar idi ni Vice Mayor Lourdes Baquiran iti pammilin kas agdama idi a mayor a nangisuno ken ni Mayor Eva Marie S. Medina bayat ti kaawan daytoy, kadagiti aglaklako iti karne a saanda nga ilaok dagiti karne nga adda tulangna kadagiti puro a lasag ken panangsurotda iti presio a P170 kada kilo.

Pinatgan ti sangguniang panlalawigan ti petision dagiti meat vendors kalpasan a nagpirmada iti MOA nga isublida ti presio ti karne ti baboy iti P170.00 kada kilo no bumaba ti presio ti liveweight iti P115 kada kilo wenno nababbaba.#

Comments are closed.