Footer

Barut ti koriente, natakaw iti dua a pagadalan

SANTA, Ilocos Sur – Dua a pagadalan ti naireport a natakawan ditoy nga ili a mapapati a nagsaruno a naisayangkat idi rabii ti Septiembre 5.

Natakaw iti Santa Central School ti agarup 300 metro ti kaatiddogna a kobre a barut ti koriente idinto nga aganay met a 200 metro ti electrical wire ti kinasakas dagiti mannibrong iti Mabilbila Integrated School.

Mapapati a simrek dagiti mannanakaw iti SCS babaen ti panangputedda iti interlinks ti alad ket pinutedda dagiti copper wire manipud iti main building a kumamang iti PTA building ken dadduma pay a building.

Iti met SIS, simrek dagiti mannanakaw iti main gate ket idi addadan iti uneg, pinutedda ti waya a nakakonekta manipud iti akin-amianan a building a kumamang iti akindaya a building ti pagadalan.

Kanaig daytoy, pinasiar dagiti polis dagiti junk shops iti ili ken kadarappatna nga il-ili ket nagsaludsodda no adda naglako iti barut ti koriente.

Kasta met a binagbagaan dagiti polis dagiti dadaulo iti dua a pagadalan nga estriktiranda dagiti sumsumrek nga ambulant vendors iti pagadalan amangan no agsipsiput laeng dagitoy iti takawenda.#

Comments are closed.