Footer

Dagiti Itta a Mangdadael iti Imahe ti Simbaan

Ni Tatang Lakay
(Maudi a paset)

Sabali laeng ti maysa a padi a nagbalin a kritiko iti maysa a nangato nga opisial ti probinsia.

Ti makadakes, usaren daytoy a padi ti pulpito tapno kritikarenna ti nangato nga opisial.

Dimi maawatan no apay a nakaro ti panangkritikar daytoy a padi iti nangato nga opisial idinto a kabarbaro daytoy iti takemna ken mapaliiw met nga ar-aramidenna amin a kabaelanna tapno mapagluposna ti biag dagiti kaprobinsiaanna.

Ngem iti panangtimbangmi kadagiti napasamak, napatalgedan ti pammatimi a ti nangato nga opisial ti nagdas-alan dagiti “nagkurangan” ti amana.

Kadakami, saan a nainkalintegan daytoy. Apay a ti anak ti aglak-am iti pammabalaw gapu iti nagkurangan ti ama? Pagtitinnawidan kadi ti babak, kas iti panagsisinnublat iti takem iti turay a kas iti mapaspasamak iti pagilian?

Uray ti pannakabukitkit ti eskandalo ti PDAF a pannakatakaw ti kuarta dagiti umili nga imbes a maipaay kadagiti makasapul nga ahensia ti turay, naikargada ketdi iti bulsa dagiti sumagmamano nga agilinlinteg, no patien dagiti damag ket adda dagiti papadi a napalladawan para iti proyektoda iti simbaan.

Mabalintayo a kunaen a saan koma a mababalaw dagiti immawat ta dida met ammo a saan a nasayaat ti pannakagamulo ti pondo a nagtaudan ti “naiparsiak” kadakuada. Ngem adda dagiti insidente nga uray ammo dagiti papadi ti nagtaudan ti kuarta a naited a kas donasion iti simbaan, awatenda latta.

Mabalin a saan nga annugoten ti Simbaan ngem adda dagiti pasurotna nga agaw-awat iti limos, saranay, donasion wenno ania ditan uray ammoda a nagtaud iti sugal, kas iti hueteng wenno manipud iti negosio ti droga.

Masaludsod: maiparbeng kadi nga awaten ti maysa a padi ti donasion idinto nga ammona a ti tao a mangited ket maysa a jueteng lord wenno mapapati a maysa a drug trafficker? Kasano a maipalawagna wenno maikalinteganna, isu a pasurot ti Dios a mangkonkontra iti hueteng, a maitudtudo a mangrakrak iti moralidad ti kagimongan, mamagbalin kadagiti tattao nga agpanpannuray lattan iti “ay-ayam iti gasat” ta imbes nga igatangna koma iti taraon a pangsilpona iti anges ti makurkurangan a pamiliana, ipustana pay laeng bareng mapaspasarakanna ti mangabak? Kasano a mairusok ti maysa a padi ti umawat iti limos idinto nga ammona a naggapu iti tao a mapagsuspetsaan nga agnegnegosio iti droga nga iyik-ikkisna iti pulpito a mangrakrak kadagiti pagtaengan ken mangidagel wenno mangirarem iti masakbayan dagiti mailuod iti daytoy a bisio?

Maysa a pagraeman a dadaulo ti Simbaan ti nagkuna: “Uray no ni Satanas ti naggapuan ti limos, awatek para iti pagimbagan ti Simbaan.”

Killo a panangikalintegan! Ti makadakes, nagtaud iti bibig ti maysa a tangtangaden a dadaulo ti Simbaan.

Iti napalabas, naglak-am ti Simbaan iti pammabalaw gapu iti panangitedna iti suportana kadagiti padi a naireklamo iti seksual a panagabuso. Dakkel pay a nakababalawanna iti saanna a panagtignay tapno maalay-ayan wenno tulongan dagiti biktima dagiti pastorna iti sexual harassment wenno panagabuso.

Kaadduan kadagiti biktima ti nagulimek lattan wenno nagsagaba a siuulimek tapno laeng saan a maipalgak ti linak-amda a pannakaibabain.

Ngem ita ta inakon ti Simbaan nga adda dagiti papadi iti babaenna nga abusado, simmiasi iti dalan gapu iti material ken seksual a rason, kasapulan metten nga agtignay a mangipakat kadagiti paglintegan tapno malapdan dagiti eskandalo a pakainaigan dagiti padi.

Dayawenmi ngarud ti inisiatibo a mangipasdek iti board a mangiggem kadagiti reklamo ken pulong maikontra kadagiti padi a saan a lumbes kadagiti proseso a legal, sibil man wenno linteg ti Simbaan.

Kas nakunamin, rumbeng a mapakatan iti pannusa dagiti padi nga aglabsing. Adda singasing a no nagaramid iti dakes ti maysa a padi, maikkaten a padi ngem iti biang dagiti dadduma, nasaysayaat a suroten ti ehemplo ti sibil a paglintegan, a mangipakat iti pannusa kas katukad iti inaramid ti padi a dakes.

Kasta met a masapul nga ipaayan ti Simbaan dagiti biktima iti naan-anay a tulong para iti kasapulanda ken iti panangabaruananda. Saan la a pinansial a tulong ti kasapulan dagiti biktima, kasapulanda unay dagiti ballakad tapno maaturda dagiti biddut iti biagda ken mapasublida ti panagtalek ken panagraem kadagiti pasurot ti Dios.

Ania man ti surotenda, mangnamnamakami a dagitoy nga addang ti mamagsubli iti mapukpukawen a panagtalek dagiti umili iti Simbaan.

Saan a malibak a gapu iti aramid dagiti sumagmamano, namantsaan ti rupa ti Simbaan a nangipababa iti panagraem dagiti tattao kadagiti padi a ladawan koma iti nangato a moralidad.#.

Comments are closed.