Footer

EDITORIAL: Adu pay dagiti disente a polis

Makapariribuk-pakinakem dagiti damag itay lawasna mainaig dagiti polis a nainbolbar kadagiti maikaniwas ken illegal nga aktibidad. Dakamatentayo dagitoy sumaganad:

Uppat a polis a kameng ti Manila Police District ti inakusaran ti maysa a Korean national a nangkikil kenkuana.

Segun iti report, nagsubang da Cho Yong-woo, 36, ken ni Kim Hae Sung iti maysa a restaurant iti Ermita, Manila gapu ta saan met laengen a bayadan ni Kim ti utangna a P500,000.00 ken ni Cho.

Dagiti akusado a polis ti nagresponde iti dayta a napasamak.

Kinuna ni Cho a binutbuteng dagiti polis a maibaludda gapu iti panangriribukda ngem no mangtedda iti P100,000.00, maruk-atanda ken awan ti kaso a maipila maikontra kadakuada.

Naipan dagiti dua iti MPD headquarters ket imbaga manen dagiti polis a mangiremedio ni Cho iti P50,000.00. Nakitinnawar ni Cho ket naipabassit ti dawdawaten dagiti polis iti P30,000.00.

Ngem idi naiyawaten ni Cho ti kuarta, saan met a nawayawayaan no di ket naipan iti prosecutor’s office ket naipababaen iti inquest proceedings para iti kaso a physical injuries.

Iti sabali a damag, natiliwan ti maysa a polis manipud iti National Capital Region Police Office (NCRPO) nga adda ikutna a droga.

Adda physical disabilities ti nasao a polis a naalana iti pannakipinnaltogna iti padana a polis a nagramut iti panagkinnusilapda.

Iti dayta a panagdueloda, natamaan met ti kinapinnaltog ti polis ngem nakarekobre daytoy, saan a kas kenkuana a narigaten a makapagna.

Ngem iti baet ti kaaddan ti rangkap ti bagina, agisaysayangkat gayam daytoy iti illegal nga aktibidad.

Iti sabali pay a damag, siam a polis ti naimplikar iti panagtakaw iti EDSA.
Iti pannakaisurat daytoy, boluntario a simmuko ti lima kadagiti akusado ngem mabirbirok pay laeng dagiti kaduada nga uppat.

Dagitoy a damag ti mangmanmantsa iti kapolisan ken mangpukpukaw iti panagtalek dagiti umili kadakuada.

Saan ngarud a nakakaskasdaaw nga adu a polis ti nababa ti moraleda gapu ta apektadoda iti dakes nga aramid dagiti sumagmamano nga itta a kabaddungalanda.

Ngem saan koma a paapektaran dagiti kaaduan a polis gapu iti aramid iti sumagmamano. Itultuloyda ketdi koma ti agserbi a sipupudno, ken mangibaklay iti pagrebbenganda kas pannakabagi ti linteg.

Laglagipenda koma a naipabaklay iti abagada ti pannakatagiben ti urnos ken talna, ken iti pannakaparukma kadagiti dakes nga elemento ken dagiti rinuker a tattao iti kagimongan. Saanda koma nga itulok a dadaelen laeng ti sumagmamano a polis ti imahe ti intero nga institusion. Saanda koma nga itulok a mapukaw ti panagtalek dagiti umili iti kapolisan gapu laeng iti dakes nga aramid ti sumagmamano.

Ta no awanen ti panagtalek dagiti umili iti polis, asino pay ti sabali a pagkamanganda iti kanito a kasapulanda ti tulong?#