Footer

Roxas dike, maserraan; problema iti trapiko, maam-amak mapasaran iti Vigan City

VIGAN CITY – Mangrugi iti Septiembre 15, maserraan ti akinlaud amin a dike a maysa kadagiti entry/exit points ditoy siudad tapno marugian ti proyekto ti rangtay ti Department of Public Works and Highways, daytoy ti impakaammo ti hepe ti 1st Engineering District ti Ilocos Sur itay lawasna.

Kinuna ni 1st Engineering District Head, Engr. Rey Organo a maiserra ti Roxas Dike tapno maipatakder ti rangtay a proyekto ti DPWH a nabayagen a naiyawat iti maysa a kontratista ngem nabayag a naitantan ti pannakairugina.

Sakbay daytoy, idi Septiembre 11, naiwayat ti dry run iti pannakaserra ti Roxas Dike ngem nupay napaliiw nga ad-adda a rimmikut ti pannagna ti trapiko nangruna iti akintengnga a dike ta ditoy ti kangrunaan a sumrekan/rummuaran dagiti lugan, kinuna ni Organo a maserraanen ti nasao a dike tapno mairugin ti pannakaipatakder ti rangtay.

Kanaig daytoy, impeksa ni Mayor Eva Marie S. Medina ti isusupiatna iti pannakaiserra ti Roxas Dike agsipud ta saan pay a naluktan iti trapiko ti akindaya a dike a naserraan met gapu iti pannakakalsada ti Quirino Boulevard.

Kinuna ni Medina nga uray saan a maserraan ti dua a dike, natrapik payen ti Quezon Avenue ket nakarkaro itan ti problema ti trapiko.
“Addan iti imada ngem siak ket ipakpakaammok ti dakkel nga objectionko kaniada,” kinuna ni Medina idinto nga innayonna a mabalin met nga iyuman da Organo iti opisinada iti nasional no ania ti remedio daytoy a problema.

Maysa nga amaken ni Medina no adda emerhensia a mapasamak iti Siudad ti Vigan ket saan a dagus a dumteng ti arayat gapu iti problema ti trapiko. Nairaman ti Vigan iti listaan ti UNESCO a maysa kadagiti heritage city iti sangalubongan gapu kadagiti duog a bato a pagtaengan a naipatakder pay laeng idi tiempo dagiti Kastila.

Ngem kinuna ni Organo a mabitinen ti nasao a proyekto idinto a dinakamatna a naigiddan koma a mapatakder daytoy idi Mayo.

Kinuna pay ni Organo a mamulta ti kontratista no saanna a malpas ti proyekto iti naituding a pannakairingpasna.

Inkalintegan ti dadaulo ti 1st Engineering District a no adda didigra, adda met entry/exit points dagiti lugan kas iti Bantay-San Vicente, San Vicente-Sta. Catalina, labsanda ti Pantay Bridge idiay Pantay Daya a sumalpot iti Solid West iti Siudad ti Vigan. Kinunana a nalawa dagiti kalsada agsipud ta national road dagitoy.

Innayon ni Organo nga adda pay entry/exit points para kadagiti light vehicles iti daya a paset ti siudad kas iti San Julian a sumalpot iti San Julian, Bantay wenno iti Aggay, Bantay, ken iti Raois a sumalpot iti Sinabaan, Bantay.

Nakaprograma a mapatakderan iti rangtay dagiti tallo a dike a sumrekan/rummuaran iti siudad ti Vigan tapno nawaywaya ti panagtaray ti danum nga agpabaybay.

Nagsagrap ti Vigan City iti pannakalayus iti napalpalabas no tiempo ti matutudo wenno adda simmangbay a bagio.

Kinuna ni Organo a nakaprograma a maileppas ti rangtay iti las-ud ti 155 days ngem innayonna a makipatpatangda iti kontratista a malpas koma sakbay ti Paskua.#

Comments are closed.