Footer

Dagiti Naganko

Sinursuran: Kolum ni Jobert M. Pacnis

(Maudi a paset)

Iti iseserrekko iti kolehio iti siudad ti Tuguegarao, ti pudno a naganko ti nagbalin nga awag dagiti kaadalak kaniak. Malaksid laeng kadagiti kakaseraak— a kailiak— ta ti latta Anton ti nagbalin a birngasko. Naimbag laeng ta awan ti nakaammo kadagiti kaadalak. Sabagay, samiweng metten kadagiti lapayagko dayta a nagan.

Ta saanen a maikkat pay ti nagan iti sirok ti latok!

Ngem addaak idin iti maikatlo a tukad iti kolehio idi panaganannak iti Jopacs ti maysa kadagiti sangapulo a ka-major-ak iti College Of Engineering iti Cagayan State University, Carig, Tuguegarao City. Pinagtiponna ti nagan ken apeliedok. Mas social daw pakinggan. Ken natartarus a baliksen. Ania pay, isu daytan ti naganko kadakuada agingga a naturposmi ti lima a tawen a kursomi.

Iti panagsursuratko iti sarita, ditoy a naalak manen ti sabali a naganko aglalo kadagiti kabaddungalan a mannurat. Iti daydi pasalip ti humorous story, naguyugoy man ti riknak a mangsurat iti balabala ti sarita a nabasak iti libro ni Manong Jimmy Agpalo, ti Duyog ti Singasing II. Dinakamatna ditoy no kasano ti mangsurat iti nakakatkatawa a sarita a mangabak iti pasalip. Ken ania dagiti rumbeng a liklikan itoy a genre.

Gapu ta awan san ti di makaammo iti sarita iti Inglis nga Sleeping Beauty, daytoy man ti trinatar ni Manong Jimmy. Kasano ti pamay-an tapno agbalin a humorous? Siempre, kas kadagiti gag shows, ispupen kano ti paulona. Isliping Teody, kunana. Sana imbaskag dagiti sentence outline a mabalin a suroten. Palubosanka nga agbasbasa a mangsurat kadaytoy ket isalipmo no isu, kunana pay.

Ania pay ngarud, nangaramidak a dagus iti sarita a kas iti suhestion ni Manong Jimmy. Ket napalalo a ragsakko idi magun-od daytoy ti Maikatlo a Gunggona.

Sipud idin, nagbalinen a Teody (Tiudi no dadduma) ti birngasko kadagiti pada a mannurat. Kaaweng kano met laeng daydi impangabakko a sarita iti salip dagiti agdadamo, ti Maestro Odi.

Iti met kinamannursurok ita, naaweng a Sir Job, Si Jobert, wenno Sir Pacnis ti awag dagiti ubbingmi kaniak. Ken kadagiti nagbalinen nga adalak a nakaragpat metten kadagiti arapaapda. Uray nakangatodan iti adal, a nangatngato payen ti saadda, dida latta a maikkat dayta a tawagda kaniak. Ket makunak a pudno la unay nga awan ngatan ti kararagsakan a paset iti biag ti mannursuro ti makitana a nagballigi dagiti sigud nga adalanna ken am-ammoda latta iti agnanayon.

Wen, addaantayo kadagiti nadumaduma a nagan. Ngem maipaganetget laeng a maymaysa koma ti usarentayo iti ania man a legal a transaksion iti biagtayo. Ngem sakbay nga usarentayo daytoy, siguraduen pay a daytoy ti nakarehistro iti NSO. Ta uray bassit laeng a biddut iti ispeling, dakkelen a taktak ken paggastuan iti masanguanan no di agpapada dagiti inus-usartayo/nakalanad a nagan iti nagbuniagan (baptismal), rehistro iti munisipio, rehistro iti NSO, dokumento iti pagadalan ken dadduma pay. Isu nga agingga a nasapa pay, aturenen dagiti biddut a nagantayo.

Anton. Butonton. Jopacs. Teody wenno Tiudi. Sir Job, Sir Jobert. Sir Pacnis. Nadumaduma a pangnaganda kaniak agpapan kadagitoy. Ngem tunggal maysa, addaan iti namaris a pakasaritaan—wen, makunak a kasta itan. Karaip dagitoy a nagan ti relasionko iti tao a mangaw-awag kaniak kadagitoy. Relasion a mangpasinged iti panagaammo.#