Footer

Uppat nga Aldaw, Tallo a Rabii

Ababa a Nobela ni Salvador A. Espejo
(Maudi a paset)

“Janette Amargo ti inaramat ni Ka Anselma a nagan tapno makaluban ti kaaddana iti pagkonbesionan. Isu ti dadaulo ti grupo a nangtakaw iti bagko iti Nikolai Inn. Ti di ammo da Ka Anselma ket nairanta ti bag a matakaw tapno adda mangipatuldo iti yanda. Dida ammo nga adda tracking device nga inkabilmi iti bag ket daytoy ti nangipatuldo kadagiti operatiba iti hideoutda iti ruar ti siudad,” kinuna ni Margret.

“Apay a dimo imbaga kaniak dagitoy?” kinuna ni Randolf. “Arigko ti bulsek nga agkarkarawa iti kasipngetan a dina ammo nga adda gayamen iti wangawangan ti peggad.”

“Ladingitek ta inlibakko kenka, ngem napateg ti missionko. Bassit laeng a kibaltang ket maibutaktak ti pudpudno a gagarak ditoy Cagayan ket mapukawmi a maminpinsan ti lead no asino dagiti aglinglinged a tattao nga adda iti likudan ti operasion,” kinuna ni Margret.

“Ket dayawenka, Mr. Garcia, ta dimo intulok a maammuan da Ka Martin dagiti naduktalam,” kinuna ni Sgt. Meneses. “Naaddaankami kadagiti operatibak iti tiempo a nagkuti. Napalawlawanmin ti hideout dagiti kabusor. Awanen ti lusotanda pay,” kinuna ni Marco.

Saanen a nagbayag ni Sgt. Meneses. Nagpakada. Madamdama, nangeg laengen ni Randolf ti panangbilinna kadagiti taona a lumugandan iti sasakayan. Nagbanurbor ti lugan ket sumagmamano pay a kanito, inalun-on idan ti kasipngetan.

Nagari ti ulimek iti kuarto. Inut-utob ni Randolf dagiti naammuanna manipud ken ni Sgt. Meneses ken ni Margret. Ngem iyeg-ipanaw ti angin ti ayamuom-babai a sumalsallin kadagiti saludsod a pinarnuay dagiti pasamak iti las-ud ti uppat nga aldaw ken tallo a rabii a kaaddana iti Cagayan.

“Hey! excuse me, are you still here?” inkidag ni Margret.

“Sori, adda laeng pampanunotek,” nakuna ni Randolf.

“You’re being serious again,” inkuddot ni Margret.

“Pampanunotek daydi rabii nga ipapanta iti Nikolai Inn. Adda sumagmamano a kayatko a malawlawagan,” kinuna ketdi ni Randolf.

“Mannuratka la nga agpayso,” nagkatawa ni Margret. “Ok, now that we have all the time of the world. Ken maysa, I want to set some things straight.”

“Dika koma mapasugkian… ngem sinoka a talaga?”

Nagkatawa ni Margret. “Ammok a dumteng daytoy a kanito a saludsodem dayta kaniak. Well, kas panangiyam-ammok iti bagik idi damota ti agkita, maysaak a freelance writer nga agsursurat iti women’s magazine. Agpayso nga imbaonnak ti editormi a mangsurat iti kultura ditoy Kailokuan. Plano ngamin ti magasinmi ti mangiruar iti espesial nga isyo mainaig dagiti nagkauna nga Ilokano a napan nagtrabaho iti Netherlands.”

Saan a nagtimek ni Randolf. Inurayna ti sumaruno a balikas ti balasang.

“Kinapudno, nabayagen a planok ti umay iti Ilokos. Ngem awan ti panawenko ken umdas nga urnongko. Ngem maysa nga aldaw, makabulan itan ti napalabas, maysa nga opisial ti buyot ti immay iti opisinami. Dinamagna no kayatko ti agbakasion iti Pilipinas. Dinamagko no ania ti kasukat dayta nga awisna kaniak. Siempre, dakkel ti dudak kadagiti kakasta nga awis. Dita a naammuak nga adda mission a pakaibaonak iti Pilipinas nangruna ditoy Cagayan.”

“Ti missionmo ket adda pakainaiganna iti maipuslit a martilio, saan kadi?” kinuna ni Randolf.

Saan a nagtimek ni Margret ngem adda naimaldit a suspetsa iti matana idi taldiapanna ni Randolf.

“Kasano nga ammom nga adda maipuslit a martilio?” inamad ti balasang idi agangay.

“Mannuratak, saan kadi?” immisem ni Randolf iti bangbangir. “Mapagsasaipko dagiti pasamak.”

“Ni laeng Sgt. Luke Meneses – am-ammom a kas Marco – ti makaammo iti maipapan ti maipuslit a martilio. Ania pay ti ammom a diak ammo?

“Ammok a code name laeng ti martilio,” kinuna ni Randolf. “Babaen ti panangsasaipko kadagiti napasamak, siguradoak a narkotiko dagiti maipuslit a kargamento a maisanglad iti maysa a lugar ti Cagayan.”

“Kasano nga ammom a narkotiko dagiti maipuslit a kargamento?”

“Elementary, my dear Margret Anderson. Intel operative iti Narcotics Division ni Sgt. Meneses.”

“Diak nasirip dayta, a,” kinuna ni Margret. “Ammom no ania a petsa ken lugar ti pakaipuslitan dagiti narkotiko?” pinerreng ni Margret ni Randolf.

“Simple laeng. Nakasurat iti rabaw ti sobre ti Janette Amargo, 123 Tuguegarao City. Agdadata a January 12, alas tres ti parbangon ti isasanglad dagiti narkotiko,” kinuna ni Randolf.

“Stop it!” kellaat nga impakurus ni Margret ti tanganna iti bibig ni Randolf. “Naimbag ta dimo nadakamat daytoy ken ni Sgt. Meneses. Sigurado la ketdi a dinaka pay palusposan ket palutpotenna kenka no kasano nga ammom dagita nga impormasion. Planuenta ketdi ti aramidenta bayat ti kaaddak iti Vigan.”

“Dumagaska iti Vigan?” nasaludsod ni Randolf.
“Of course! Diak kadi met naibaga kenka a kayatko a palabsen ti tallo nga aldaw iti Vigan City…. iti dennam!” inkuddot ni Margret.

Nakalawlawa ti isem a timmamidaw iti bibig ni Randolf.

“Daytan ti kapintasan a balikas a nangegko manipud kenka,” nakunana.

Saannan a naituloy ti sawenna ta inarakup a siirut ni Margret sa immagek iti nakapapaut!

(Gibusna)