Footer

3 naapput bayat ti pot session

SINAIT, Ilocos Sur – Tallo a tattao ti naapput dagiti polis bayat ti pot sessionda iti balay ti maysa kadagiti suspek idi malem ti Septiembre 16.

Inaresto dagiti nagtitipon nga elemento ti kapolisan nga indauluan da Chief Inspector Jason Nadarisay ken PDEA ISSET nga indauluan ni 101 Dexter Regaspi ken polis-Candon City da Carmelo Haber y Agbalos, 50, naasawaan, vendor, ken residente iti Barangay Burgos, Sta. Lucia; Joanna Verano y Albao, 32, awanan asawa, ken residente iti Maligaya St., Las Piñas, Metro Manila; ken Jocelyn Haber y Candido, 47, naasawaan, residente iti Barangay Burgos, Sta. Lucia.

Nakakumpiska dagiti operatiba iti ikut dagiti suspek iti maysa a bassit a sachet a nagkarga iti mapapati a shabu, maysa a plastic sachet a naglaon kadagiti residue a mapapati a shabu, maysa a naaramat a foil nga adda mapapati a shabu residue, maysa nga improvised glass tooter nga addaan shabu residue, maysa nga improvised plastic scooper, 3 lighters, assorted improvised glass tooters nga addaan mapapati a shabu residues, assorted improvised glass tooter ken maysa a pakete ti sigarilio a naglaon iti mapapati a drug paraphernalia.

Nakikoordinar dagiti operatiba kadagiti barangay officials sakbay nga insayangkatda ti nasao nga operasion.

Naipan dagiti suspek agraman dagiti nakumpiska a mapapati a droga ken paraphernalia iti estasion ti polis ti Sta. Lucia para iti umisu a disposision.

Kabayatanna, dua nga estudiante ti natiliw nga agikut iti maiparparit a droga iti Barangay Macabiag, Sinait, partikular iti sango ti fire station idi malem ti Septiembre 12.

Nangipasdek iti tsekpoint iti nadakamat a lugar dagiti polis nga indauluan ni Inspector Dionisio C. Baldillo III, Invest PCO, kalpasan a nakaawatda iti impormasion nga adda dua a lalaki nga adda ikutda a droga a nakalugan iti motorsiklo nga agpaamianan a direksion.

Idi agarup 2:00 ti malem, pinasardeng dagiti polis iti checkpoint ti XRM a minaneho ni Mark Anthony Tolentino y Piano, 18, estudiante iti University of Northern Philippines, ken residente iti Barangay Patong, Magsingal, Ilocos Sur, ken ti back rider a ni Bradley Udanin y Layco, 17, estudiante iti STI, Vigan City.

Nakakumpiska dagiti polis iti ikut dagiti dua ti maysa a bassit a heat sealed plastic sachet a naglaon iti mapapati a shabu, improvised tooters, maysa a lighter ken drug paraphernalia.

Naipan dagiti suspek iti police station para iti naan-anay nga inbestigasion ken disposision.

Naipatulod met dagiti nakumpiska a mapapati a droga ken drug paraphernalia iti Ilocos Norte Provincial Crime Laboratory para iti pannakaamirisda.#