Footer

BANNER NEWS: Ilocos Sur, binasnot ni Bagyo Mario

VIGAN CITY – Naglak-am ti probinsia ti Ilocos Sur iti nakaro a didigra iti panangbasnot kenkuana ti Bagyo Mario idi rabii ti Biernes, Septiembre 19, agingga iti agsapa ti Septiembre 20.

Iti report manipud iti Provincial Disaster Risk Reduction Management Council, nagawan ti koriente iti sibubukel a probinsia idi rabii ti Biernes, Septiembre 19, gapu iti napigsa a bayakabak a binulonan pay ti napigsa nga angin a nakaigapuan iti pannakapugsat dagiti barut ti elektrisidad ken pannakatuang dagiti poste.

Iti inisial a report ti PDRRMC, nadidigra ti 129 a barangay a nakaapektaran ti 4,661 a pamilia wenno iti kadagupan a 23,671 a tattao, ken nakadadaelan a total dagiti 170 a balbalay ken partial a nakadadaelan dagiti 1,176 a pagtaengan.

Kanaig daytoy, indeklara ni Gov. Ryan Singson a maipababaen iti state of calamity ti sibubukel a probinsia gapu iti kalawa ti sinagrapna a didigra manipud ken ni Bagyo Mario tapno mapadaras ti pannakaidanon dagiti relief goods kadagiti naapektaran nga il-ili.

Kabayatanna, naireport a saan a makalasat dagiti lugan iti junction ti Narvacan, sumagmamano a paset ti Sta. Maria, ken iti Candon City a nakakubongan dagiti agbiahe.

Nupay kasta, nakalasat met laeng dagiti biahero kalpasan a naiwalin dagiti naibalangan a sanga ti kaykayo, ken panages-es met la ti dakkel a danum a nanglayus kadagiti kalsada.

Iti Vigan City, kinuna ni CDRRMC Officer Mila Alquiza nga imbakuitda iti San Julian Elementary School dagiti agnaed iti Shelterville nga adda iti asideg ti creek gapu iti napardas a panagpangato ti danum.

Nagpatulong pay ni Alquiza iti ISECO iti pannakaiwalin dagiti natuang a poste iti Barangay Bulala, Barangay IV, Barangay Beddeng Laud, ken Barangay Pantay tapno makalasat ti lugan ti rescue team para iti clearing operations para kadagiti nagpatulong a residente kadagitoy a lugar.

Dagus a nagtignay ti ISECO babaen ti tulong ni Director Jun Ramos para iti pannakaiwalin dagiti naibalangan a poste iti dalan.

Naibuang met dagiti fishcages iti Mestizo River gapu iti kapigsa ti agus ket nakabulos dagiti taraken a tilapia a mailako koman.

Iti Santa, nagpaarayat dagiti agindeg iti coastal barangays ti Barangay Tabucolan, Pasungol, ken Calungboyan gapu iti panagdinakkel ti danum. Dagus nga impatulod ti PDRRMC dagiti support group a pakaibilangan ti Philippine Army ken coast guard.

Kanaig daytoy, nagsagrap iti pammabalaw ti PAGASA gapu iti waragawagna nga adda laeng ti Ilocos Sur iti babaen ti Signal No. 1.

Kas sagudayen ti advisory manipud iti PAGASA, no Signal No. 1, agpegges ti angin iti 30-60 kilometro kada oras ket manamnama a marikna iti las-ud ti 36 nga oras. Iti kastoy a signal, maspak dagiti sanga dagiti babassit a kayo; agirig wenno mabual dagiti sumagmamano a mula a saba; maitayab ti atep dagiti balbalay a nipa ken kugon laeng; no saan a maipangato ti signal bayat ti kaaddan ti bagyo, bassit laeng wenno awan ti dadael a sagrapen dagiti madalanan a komunidad; ken dakkel ti dadael dagiti pinagayan no agbugin dagitoy.
Ngem inkalintegan ti maysa nga empleada ti PAGASA a para monitorda laeng iti data ti bagyo ket ti nasional nga opisinada ti mangideklara iti signal ti bagyo kas maibatay kadagiti ipatulodda a data.#

Comments are closed.