Footer

EDITORIAL: Buis manipud iti bisio, maipaay iti salun-at

Naawagan daytoy a linteg a Sin Tax Law gapu ta napanday a kangrunaan a puntiria ti gobierno ti panagkolektana iti buis manipud kadagiti makuna a ‘bisio’ kas iti panagsigarilio ken panaginum iti arak.

Adu nga agilinlinteg ti agaripapa a maipakatan iti dakdakkel a buis ti arak ken sigarilio agsipud iti aripapa nga imbes a dumakkel ti pamastrekan ti gobierno kadagitoy a bisio, bumaba ketdi agsipud ta mapattapatta a bumassit ti bilang dagiti agpayubyob iti sigarilio ken uminum iti arak gapu ta dakkel a pakalussokan ti bulsada gapu iti ingingina ti presioda.

Ngem dakkel ti pammati ti gobierno a saan a bumaba daytoy nga industria no di ket babaen dagiti makolekta a buis kadagitoy, mabenepisiaran dagiti ahensia a mangitaltal-o iti salun-at dagiti umili, kas iti Department of Health, PhilHealth ken DSWD.

Makita a saan a nagbiddut ti agdama nga administrasion a nangipursigi iti pannakaanamong daytoy a linteg agsipud ta nagbalin a dakkel a katulonganna iti pannakapaadda kadagiti kasapulan ti Universal Health Care (UHC) a programana iti salun-at.

Segun iti New Vois Association of the Philippines, iti P91.6 billion a napastrek ti gobierno idi 2013, nasurok a dua a pagkatlo wenno P61.622 billion ti naggapu iti produkto ti tabako idinto a ti maysa nga apagkatlo wenno P30 billion ti nagtaud manipud iti arak.

Manipud iti daytoy a napastrek, 85% ti mapan iti Department of Health ket kadakkelan nga ilgat ti maited iti PhilHealth ken ti UHC program ti nasional a gobierno.

Segun met iti DSWD, agarup 14.5 million a napili a pamilia a benepisario ti National Housing Targeting System (NHTS) ti agsagrap iti pagimbagan babaen iti maited kadakuada a PhilHealth cards.

Dakkel ti namnama a babaen ti tulong ti Sin Tax Law, matun-oy ti PhilHealth a saklawen ti 100 porsiento para kadagiti amin a Filipino iti nabatbati pay a dua a tawen ti administrasion ni Pres. Benigno Aquino III manipud iti agdama a 82 a porsiento.

Manamnama a makapastrek ti gobierno iti P105.3 billion manipud iti sin products agsipud ta iti pannakaimplementar ti Sin Tax Law, ngumato iti tinawen ti buis manipud iti sigarilio ken alkohol.

Saluduanmi ti gobierno iti pannakaipakat ti Sin Tax Law. Ta nupay agpaspastrek ti gobierno iti dakkel a buis manipud iti bisio dagiti umili kas iti panagsigarilio ken panaginum iti arak, agpaay ti mapastrek para iti pannakaipaay iti napinpintas a serbisio para iti salun-at nangruna dagiti marigrigat nga umili.#

Comments are closed.