Footer

Jogger, nagandat ti biagna

VIGAN CITY – Blangko pay laeng ti panagpalutpot dagiti polis no asino ti nanggandat iti biag ti maysa a lalaki bayat ti panagdiagingna iti Plaza Salcedo ditoy siudad idi agsapa ti 5:32 ti Septiembre 16.

Nabigbig ti biktima a ni Carlos Papagayo y Ramos, 43, naasawaan ken residente iti Barangay Ayusan Norte, Vigan City.

Segun iti report, madama nga agdiagdiaging ti biktima iti sidewalk iti amiananen ti Plaza Salcedo idi agarup 5:31 ti agsapa ti nadakamat a petsa idi pinaltogan ti maysa a lalaki iti sumagmamano a daras a nagsagrapanna kadagiti sugat iti nadumaduma a paset ti bagina.

Kalpasan ti pammaltog, simmakay ti di nabigbig a suspek iti di ammo ti klasena a motorsiklo a minaneho ti mapapati a kumplotna ket naglibasda a nagpaamianan a direksion iti Govantes Dike.

Intaray dagiti immarayat a tattao ti biktima iti Gabriela Silang General Hospital para iti pannakataming dagiti sugatna.

Nangipakat dagiti nagresponde a polis iti pursuit operation ken nangipatulodda iti flash alarm kadagiti kabangibang ti siudad a police stations ngem negatibo ti resultana.

Naammuan ti Tawid News a nalasatanen ti biktima ti peggad.

Nakasarak dagiti inbestigador iti walo a kapsula manipud iti cal. 45 iti nakapasamakan ti pammaltog.

Saan pay nga ammo ti motibo ti pannakagandat ti biag ni Papagayo. Ngem mapapati a saan a propesional a mammapatay dagiti suspek agsipud ta saanda a napuruan ti biktima iti baet ti kaadu ti imputokda.

Kabayatanna, naireport idi Septiembre 13 a nagandat ti biag ti maysa a mannalon babaen ti kalugaranna a maysa met laeng a mannalon sadiay Barangay Quimmarayan, Sto. Domingo, Ilocos Sur a mapapati a nagramut iti dati a susik.

Iti panagimbestiga dagiti polis-Sto. Domingo, bayat ti panagballasiw ni Rolando Ramos y Molina, 45, naasawaan, iti hanging bridge, pinaltogan ni Alberto Pimienta y Ped, 60, naasawaan, agpada nga agnaed iti Barangay Quimmarayan, Sto. Domingo, a nagsagrapan ti immuna iti sugat iti makannawan nga abagana, makannawan a barukongna ken timid.

Nupay nasugatan, nabaelan ni Ramos ti bimmales ket napaltoganna ti makannigid a saka ken makannigid a dakulap ni Pimienta.

Agpada dagiti dua a naitaray iti ospital para iti pannakaagas dagiti sugatda.

Saan narekobre dagiti polis dagiti paltog nga inaramat dagiti dua nupay mapapati nga agpada a homemade buckshot kas maibatay kadagiti sugatda.

Agtultuloy ti panagimbestiga dagiti polis mainaig iti nasao a panagpinnaltog dagiti agkalugaran.#

Comments are closed.