Footer

Mannalon, nakoriente

BANTAY, Ilocos Sur – Natay iti pannakakoriente ti maysa a mannalon idi napanna inwayway ti bakana iti kataltalonan iti Barangay Sagpat ditoy nga ili idi agsapa ti Septiembre 15.

Nasarakan ni Reynaldo Pilot y Corpuz, 36, naasawaan, a nakadalutaytay iti daga a nakabalangan ti barut ti koriente iti bagina.

Segun ken ni Pedro, kabsat ti biktima, nakapayong a napan inwayway ni Pilot ti bakana iti kataltalonan iti nasapa a bigat.
Idi agarup 6:20 iti dayta met la nga agsapa, nakita ni Pedro ti payong a nabati iti dalan ngem awan ti kabsatna ket idi napanna kinita, nasukalanna laengen daytoy a nakadalutaytay iti daga.

Mapapati a natinnag ti barut iti daga gapu iti napigsa nga angin ket idi simmangpet ti biktima, iniggamanna tapno ipaigidna nga isu metten ti nakakorienteanna.#