Footer

Natakaw a tubo natuntonan iti junkshop

BANAYOYO, Ilocos Sur – Pati tubo ti munisipio ditoy nga ili ket saan a pakawanen a takawen ti mannibrong a taga-sabali nga ili.

Inreport ni Oliver Fabros y Orpilla, 24, naasawaan, utility worker, ken residente iti Barangay Poblacion, iti polis a napukaw ti walo a 2″x2″ GI water pipe a nainstolar sadiay Sitio Greenhills, Barangay Elefante ket masuspetsa a natakawda.

Agbalor iti P7,200.00 dagiti natakaw a tubo.

Iti panagimbestiga dagiti polis-Banayoyo, natuntonanda ti uppat a tubo iti junkshop a kukua ti maysa a residente iti Barangay Poblacion, Lidlidda, Ilocos Sur.

Kinuna ni Jun Dimalanta a ginatangna dagiti uppat a tubo manipud iti maysa a Willy Morales y Layao, 32, baro, ken residente iti Barangay San Milano, San Emilio, Ilocos Sur.

Naipan dagiti tubo iti estasion ti polis ti Banayoyo para iti umisu a disposision.
Iti pannakaisurat daytoy, di pay natuntonan ti nakailakuan ti uppat pay a tubo.#

Comments are closed.