Footer

Sinursuran: Tarabayen dagiti Ubbing

Kolum ni Jobert M. Pacnis
(Umuna a paset)

NAKAAY-AYAT man daytoy nasagangko iti facebook. Kasla angaw laeng. Mangted liwliwa wenno pagkakatawaan. Ngem nabagas a pagiinnadalan.

Pinaayaban kano ni Mestra Mona ni Manang Imiang gapu iti kinatuleng ni Sabas nga anakna. Daytoy man ti eksena:

Maestra: Pinaayabankayo, manang, gapu kadagiti aramid ni Sabas nga ubingtayo. Awan dengdenggenna. Nakasubsubeg ken nakasutsutil.

Manang Imiang: Ney, mestra, ampeyr met daytoyen, a, a panangayabyo kaniak.

Maestra: Apay, manang? Para met iti pagsayaatan ti ubingtayo ti amin. Kayatko la nga idanon kadakayo dagiti ar-aramidenna tapno makapagtitinnulongtayo a mangatur kenkuana.

Manang Imiang: Talaga nga ampeyr, mestra!

Maestra: Aniat’ kayatyo a sawen, manang?

Manang Imiang: Kastana met kasutil ken katuleng idiay balay, mestra. Ngem pulos a dikayo pinapaayaban

Ang-angaw. Pagkakatawaan. Kasta ti panangipapantayo iti umuna a pannakabasatayo kadayta. Ngem no usigen, panunoten a nalaing, adda maarisittayo a sabali nga anggulo. Adda sabali a kayatna nga ipaawat.

Iti kinamoderno itan ti panawen, bassit unayen ti oras dagiti nagannak kadagiti bungada. Ad-addan a ti panggedanda ti yan ti orasda. Sada laeng makadua dagiti annakda iti rabii. Yanna a pagdaksan, nabannogda unayen ket awanen ti panawenda a makasarsarita dagiti annakda. Maitudo a daytoy ti rason no apay a kasla adayo itan ti rikna dagiti ubbing, ken agtutubo, kadagiti nagannak kadakuada.

Daytoy a panaginnaddayo iti rikna, pannakayasideg met iti dakes ti kaibatoganna. Tumanor a tuleng, sulpeng, awanan modo dagitoy nga ubbing. Saanda a mangipangpangag. Agbalinda nga itta iti gimong.

Ket dayta ita ti rigatna. No di maallawat ti pagadalan, wenno maited ti kasapulan ti ubing nga ayat, awan papananna no di tumanor daytoy a buong ti ulo. Iti panagsapulna iti ayat a naipaidam kenkuana iti pagtaengan, a di pay masupusopan ti pagadalan, sididiaya dagiti gamat ti sipnget a mangguyod kenkuana.

Masaludsod la ket ngarud: ania kadi ti inaramid ti pagadalan, kangrunaan dagiti mannursuro, tapno maannongna ti akemna kadagiti naitalek kenkuana nga ubbing?

Wen met nga agpayso, ad-adu ti oras itan dagiti ubbing nga adda iti pagadalan. Ket no awan ti pamalbaliwan ti ubing iti panageskuelana, saan ngata a dakkel a sungsungbatan dayta dagiti mannursuro?

Nadagsen nga akem ti panagisuro. Saan laeng nga agtunged iti panagkompiut kadagiti grado ken panangibisik kadagiti leksion. Kaludon daytoy ti panangdisiplina kadagiti naitalek nga ubbing; ti panangpatanor kadakuada a nabunga nga anak ti pagilian.

Isu a no maminsan, adda met kinapudno dayta ang-angaw iti ngato. Apay nga awan laengen ti pamalbaliwan ti ubing? No pudno nga adda nasursurona, di kad’ koma isu ti ipakatna iti balayda?

Nakapatpateg ngarud nga aramiden koma ni mannursuro amin a kabaelanna a mangmuli iti asino man nga adalenna. Takuatenna ti kinatao daytoy; dagiti pagdaldalananna tapno iti kasta, mabinorna no kasapulan.

Yanna manen nga adat, adda latta dagiti report a dangdangran ni mannursuro ti/dagiti ubing iti babaenna. Saan a karkardayo a pasamak dagitoy. Mabuybuyatayo iti telebision. Itoy laeng a pannakasursurat daytoy nga artikulo, dua manen a maestro ti nangdangran kadagiti adalanda: sipat, labak, ken sao a di malamlamut ti aso. Kaudian daytoy ti pannakaipupok ti ubing a di laeng nakasurat iti “sulatin” nga impaaramid ti titserna. Rason ti mannursuro, aksidente kano laeng ti pannakaipupok ti ubing (a nalipatanna a pinaruar sakbay a nagawid iti balayda).

Kasanon ngay no awan ti nagpatulongan ti ubing? Di pay napupok a nagpatpatnag?

(Adda tuloyna)

Comments are closed.