Footer

Bangkay ti babai, nasarakan iti kasamekan

SAN VICENTE, Ilocos Sur – Maysan a bangkay ti baket a naireport a mapukpukaw idi kangitingit ti Bagyo Mario iti nasarakan iti asideg met laeng ti balayna sadiay Barangay Bayubay ditoy nga ili.

Nasarakan ti bangkay ni Eugenia Rivada y Pilot, 86, baak, ken residente iti Barangay Bayubay, ditoy nga ili, iti nasamek a paset ti talon a mapattapatta a 50 metros ti kaadayona manipud iti balayna.

Nakita ni Arnold Pilot y Rodillas, 54, naasawaan, retirado a Philippine Marine, bakasionista, ken residente iti Quezon City ti bangkay idi mapan agdalus iti likud ti balayda ngem maysa a Carlos Navarro y Viscarra, 43, naasawaan, ken residente iti nadakamat a barangay ti nangireport iti polis mainaig iti nasarakan a bangkay ni Rivada.

Segun iti report, agmaymaysa nga agbibiag ni Rivada ket naireport a mapukpukaw sipud pay idi Septiembre 20, kangitingit ti iduduprak ni Bagyo Mario.#