Footer

EDITORIAL: Adda ti rupak ditoy pagilian

Itay nabiit, linaon dagiti pagiwarnak, nangruna iti Entertainment Section ni Robin Padilla gapu iti makasugat a balikasna maipanggep iti pagilianna.

Kinunana a kayatnan a panawan ti Pilipinas agsipud ta nauman kadagiti kinaulbod, kinaruker nga agraraira iti pagilian.

Immuna ngem daytoy, addan dagiti areng-eng ti aktor maikontra kadagiti politiko a naisawsaw iti DAP scam. Kinaritna ni Senate Presidente Franklin Drilon nga aglusulos iti puestona gapu iti pannakaikalam-itna a maysa kadagiti kadakkelan iti inawat a pundo manipud iti DAP.

Adda pay daydi panangiyikkisna iti panagikkat amin nga agilinlinteg iti Senado ken iti Kamara gapu iti mapapati a kinaruker a mapaspasamak kadagitoy nga institusion.

Asino ni Robin Padilla? Iti agdama, maysa ni Padilla kadagiti mabigbigbig ken respetado nga artista iti pelikula ken telebision, maysa a producer, maysa kadagiti adu ti iyen-endorsona a produkto, ken TV host.

Ni Robin Padilla ti mabirbirngasan iti bad boy saan laeng a gapu kadagiti pelikulana nga inakemna ti karakter dagiti napeklan a managdakdakes wenno mammapatay, no di pay iti pudno a biag. Kinapudnona, naibalud pay ni Padilla gapu iti pannakaduktal iti luganna dagiti high powered nga armas. Ngem kalpasan ti iruruarna iti pagbaludan, intuloyna ti nagartista ket napagtalinaedna ti kinalatakna iti baet iti irurusing dagiti ubbing nga artista a nangited iti kompetision kenkuana.

Ngarud, iti maysa nga umili iti Pilipinas a kas ken ni Robin Padilla nga adda kenkuana ti kinalatak, aglaplapusanan a biag, ken nasayaat a pamilia, awan ti rason a panawanna ti pagilianna. Ngem adtoy a mangibagbaga a nauman nga agbibiag iti pagilian gapu kadagiti kinaulbod ken kinaruker nga agraraira. Pumanaw agsipud ta mamati nga awan ti panagbalbaliw a mapasamak iti asideg a masakbayan.

Posible a paset laeng daytoy a pangawisna iti imatang ti publiko maipapan iti kabarbaro a pelikulana nga “Andres Bonifacio”. Naadaltayo iti historia a maysa a katipunero ni Bonifacio a nangidaulo iti yaalsa iti turay ti Espania gapu iti naipanurok a pannakaabuso dagiti Indio manipud kadagiti agtuturay a Kastila ken dagiti praile.

Kinalikaguman ni Andres Bonifacio ti panagbalbaliw ngem babaen ti nadara a wagas ket adu a biag ti naidaton iti “kaltaang ti rabii” sakbay ti “panagbannawag ti agsapa”.

Mamatikami met a kasapulan ti panagbalbaliw, saan laeng dagiti agtuturay, no di amin nga umili a mamati a maysa a paraiso daytoy a pagilian, saan a kas iti agdama a pagdakdakiwasan dagiti karasaen, buaya, bao, ken alimatek.

Mamatikami met a magun-od ti panagbalbaliw iti natalna a wagas, saan a babaen iti murdong dagiti paltog. Ditoy a kasapulan ni Robin Padilla ken dagiti kakailian nga agal-alikuno met iti barukongda ti apuy ti pannakapaay ken pannakadismaya. Ta apay a pumanawda ditoy pagilian idinto nga adda ti rupak ditoy? Maysa a kinatakrot ti mangpanaw iti aniaman a dangadang. Kinatured ti mangirupir iti arapaap ken tarigagay uray iti sanguanan ti kasla awan panangilala ken panangitaltalek dagiti agtuturay ti pagilian a rumbeng koma a mangidaulo kadakuada iti nalinteg a dalan.

Dika pumanaw, Robin! No pudno a Filipinoka, agbalinka a pannakatimek dagiti umili. Ibagiam ketdi dagiti naruay a kakailiam a siuulimek a masmasnaayan iti agraraira a kinaulbod, kinaruker ken kinabuklis dagiti agtuturay iti pagilian.#