Footer

Ilem kadi ti Gapu a Nairurumen dagiti Hudio?

Salaysay ni Jeff Septembrina
(Maudi a paset)

Adda pay ngata tumaud a Hitler iti agdama a panawen? Segun iti historia, nabuangayen ti Organization of United Nations a pakpakauna ti United Nation (UN) ngem nakapuy pay la ngamin ti pakabuklanna idi. Ita ta adda ti napigsa a UN ken ti nabileg nga Amerika a mangidadaulo ken mangidardarirag ti kappia ken progreso, adda pay ngata tumanor a Hitler wenno Mussolini?
Ken iyad-adayo ni Apo Dios ta mapasamak manen ti nasaknap a gubat kas iti World War 1 ken II, ammotayo ngata pay ti pagluglugarantayo wenno pagkamkamangantayo no agrinnupak dagiti sopistikado nga armas?

Innayon ti maysa a pilosopo-sosiolohista a mangrugi a mismo iti bagitayo ti sungbat: agsingsingpettayo tapno saantayon a makapatanor iti kas kada Hitler, Mussolini ken Tojo Hideki ti Japan a nangaron ken nangpabara ti yubuyoban ti gubat iti Europa a nangrugian ti World War II sa nagsaknap iti Asia ken partena iti MiddleEast.

Iti pakasaritaan ti Germany, ditoy ti maysa a nagsentruan ti risiris ti puli ket natenneb iti gubgubat dagiti rehimen a nangituray iti naglabas. Kayat ni Hitler nga ipamatmat a mas dominante (Supermaster) ti Aryan race a pakaibilangan ti pulina. Dina kayat a marimbawan ti sabali a minoridad a kas kadagiti Hudio a maibilang iti Semitic race.Gapu itoy, narubroban ti riknana a mangidaulo iti Germany ket kinontrolna ti amin a benneg ti gobierno.Tapno bumilbileg pay, nagpataud iti intriga a nangibatayanna iti babalaw ken pammabasolna kadagiti nalap-it a pagilian iti aglawlawna ket babaen ti kinatusona, sinakupna dagitoy. Naaramid ti nagsasaruno a panangkautibona kadagiti pagilian a naikappeng iti pagilianna. Awan ti pakawanenna. Linib-atna dagiti pagilian iti asidegna ket nagbalin nga awan ti kaes-eskan dagiti katulagan a napagnunummuan kadagiti agbutbuteng a pagilian kenkuana.

Nagpakamatay ni Adolf Hitler babaen iti panangpaltogna ti bagina idi Abril 30, 1945 iti Führerbunker idiay Berlin. Ni Eva Braun nga asawana ket nagpakamatay met babaen iti yiinomna iti sabidong. Kalpasanna, kas pammilin ni Hitler idi sibibiag pay, nabuyatan ti bangkayda nga iti petroleo sada napuoran.

Kasta ti nakaam-ames a nagbanagan ni Adolf Hitler, ta dina kayat a matiliw, maumsi ken mahusga a kas kriminal. Mapattapatta a nasirmatana ti nasipnget a masakbayanna isu a di nagaripapa a nangkettel iti biagna a simmurotan met ti asawana.

Impresion met dagiti historiador a mabalin nga iti nalaus a pannakaibabain ti rason a kinettel ni Hitler ti biagna. Ta agasem ket mangab-abak iti gubat idi damo, ngem iti ud-udina ket naipasuli ti tropana babaen kadagiti Ruso a dumardarup. Ken ammo ni Hitler a dakkel unay ti babak a naaramidanna kadagiti Hudio, kailianna ken dagiti nasnasion a sinakupna ket saanna a kinabaelan nga awiten ti sidir ti konsensiana. Anianto la ketdin no mausig a kas kriminal ti gubat a bitay pay ti posible a pagtungpalanna!

Kuna pay dagiti kleriko a nadisenio ti tao a kalanglanga ti Dios ket bin-ig a kinaimbag koma ti aramidenna. No nagkamali ti tao, adda riknana nga agrebelde a dina makontrol ta sumidir ti konsensia agingga a maipusing iti kinapudno ken talna. Kasapulan a makiareglo iti bagina wenno padana a tao tapno maikkat ti siit dita bagina a saan a nairaman iti pannakaparsuana.

Makita iti biag ni Hitler a puro material ti paniriganna iti biag agsipud ta agturay, agagum ken dina pinampanunot ti ibunga ti inaramidna.Di pinampanunot ni Hitler nga adda keddeng ti biag ditoy lubong ket dina kinailalaan ti inted ti Dios kenkuana a gundaway nga agbiag a nadarisay idinto nga awan ti sapulennan ta adda aminen kenkuana ti kinalatak, respeto, mapagkamalian a kinasirib ta uray saan met a nakangato ti adal ket nawido a nangiturong iti biagna. Tangken-sangi ken tured-sipit laeng ti nagpupuonan daytoy nagkadinamag a kadawelan a parsua ti lubong!

Kas impalagid ti maysa a pagsasao: “Know why we’re destined to live…? #

Comments are closed.