Footer

Kameng ti NPA, natiliw iti Cervantes, Ilocos Sur

SAN FERNANDO CITY – Natiliw ti maysa a masuspetsa a kameng ti New People’s Army bayat ti operasion nga inwayat dagiti nagtitipon nga elemento ti kapolisan sadiay Barangay Comillas, Cervantes, Ilocos Sur. idi agsapa ti Septiembre 19.

Innaganan ni Police Chief Superintendent Roman A. Felix, PRO1 Director, ti natiliw a kameng ti NPA a ni Marvarose Long-ag, 26, ken residente iti nadakamat a barangay babaen ti intelligence operation nga insayangkat dagiti nagtitipon nga operatiba ti Regional Intelligence Division, Police Regional Office 1 (RID-PRO1), Regional Public Safety Battalion 1 (RPSB-1), La Union Police Provincial Office (LUPPO), AFP intelligence operatives ken lokal a polis idi agarup 5:00 ti agsapa ti nadakamat a petsa iti Barangay Comillas, Cervantes, Ilocos Sur.

Kinuna ni Felix a naaresto ni Long-ag babaen ti bileg ti warrant of arrest nga inyisio ni Judge Modesto Quismorio ti RTC Branch 25, Tagudin, Ilocos Sur a naiyisio idi Nobiembre 27, 2012.

Sumangsango ni Long-ag iti kaso a rebellion a nai-docket iti Criminal Case No. 969-T ket awan ti nairekomenda a piansana.

Masuspetsa a kameng ti Ilocos- Cordillera Regional Committee- CNN a nakabase iti Ilocos ken Cordillera regions, mapapati a nakipartisipar ni Long-ag iti pannakaambos ti Philippine Army sadiay Bessang Pass, Cervantes, Ilocos Sur idi Hunio 12, 2014 a nagresulta iti pannakasugsugat dagiti tropa ti gobierno.

Naikustodia ti suspek iti La Union Provincial Police Office para iti dokumentasion ken umiso a disposision.

Kanaig daytoy, pinadayawan ni Felix dagiti polis a nainbolbar iti naballigi nga operasion idinto nga inyunay-unayna ti panagtultuloy dagitoy a mangi-enporsar iti linteg maikontra kadagiti amin a porma ti kinadakes iti rehion.#

Mangngalap, naalaw bayat panagkatangkatangna iti baybay, 5 kakaduana, mapapati a nalmes

MAGSINGAL, Ilocos Sur – Innemda amin a mangngalap a taga-Infanta, Pangasinan a timmapog iti baybay idi malem ti Septiembre 14 ngem nasalaw ida ti dua a bagyo a puon ti mapapati a nakapursingan ti biag ti lima kadakuada.

Daytoy ti insalaysay ni Florante Roque y Curom, 35, naasawaan, mangngalap, ken residente iti Barangay Banug, Infanta, Pangasinan, kalpasan a naalaw dagiti mangngalap a taga-Puro, Magsingal idi agarup 10:00 ti bigat ti Septiembre 24.

Ni Roque ti nabatbati iti grupo a timmapog iti baybay sadiay Infanta, Pangasinan idi malem ti Septiembre 14.
Nasalaw dagiti mangngalap a taga-Puro ni Roque nga agpatpataw iti kabaybayan a nagpaay laeng a salbabidana dagiti nadadael a paset ti Fate Nathaniel a bangkada ket intarayda iti Magsingal District Hospital para iti pannakaamiris ti kasasaadna sada impakaammo iti kapolisan ti insidente.

Nupay nagsagrap iti pannakabisin ken waw iti sumagmamano nga aldaw a pannakaiyanudna iti kabaybayan, naammuan a natalged ti kasasaad ni Roque.

Segun ken ni Roque, dida ninamnama a kasta ti sagrapenda nga agkakadua idi timmapogda nga agkalap iti kabaybayan idi agarup 3:00 ti malem ti Septiembre 14.

Ngem kinuna ni Roque a kalpasan ti tallo nga aldaw a panagkalapda, insangbay ni Bagyo Luis ti napigsa nga angin idinto a dimmawel ti baybay a puon ti nakadadaelan ti bangkada.

Kinuna ni Roque a nabaelanda pay ti nagpataw ngem iti iduduprak ni Bagyo Mario a nangikuyog iti napigsa nga angin ken bayakabak, narakrak ti bangkada ket nasinasinadan nga agkakadua.

Saanen a nakita pay ni Roque dagiti kakaduana a mapapati a naarinebneb gapu iti kinadawel ti baybay ken rungsot ti panawen.

Kimpet ti biktima iti nadadael a paset ti bangkada ket daytoy ti nagpatawanna agingga a naiyanud iti kabaybayan a sakup ti Barangay Puro a nakasalawan kenkuana dagiti mangngalap a residente iti nadakamat a barangay.#