Footer

Livelihood proyect, naiyawat iti gunglo ti natengan iti Cabu

CABUGAO, Ilocos Sur -Tseke para iti livelihood project nga agbalor iti P382,000.00 ti inyawat ti Department of Labor and Employment (DOLE) kadagiti opisial ti Cabugao Cabugao Vegetable Producers and Traders Association iti opisina ni Mayor Edgar S. Cobangbang, Jr. itay Septiembre 24.

Inawat ni Armando Azcueta, presidente ti nasao a gunglo, ti tseke manipud ken ni Ilocos Sur DOLE Provincial Head Emmanuel Hagad iti mismo nga imatang ni Mayor Cobangbang, department heads ti lokal a gobierno ditoy, ken dagiti opisial ti gunglo.

Naammuan ti Tawid News a maigatang ti nasao a kantidad iti kuliglig ken water pump nga aramaten ti gunglo iti panagmula ken panagnegosioda iti nateng.
Adda P120,000.00 a counterpart ti lokal a gobierno ditoy para iti nasao a livelihood project.

Kabayatanna, iti daytoy met la a petsa, limapulo nga estudiante ti immawat iti tseke a katukad iti natgedanda iti panagtrabahoda idi Mayo daytoy a tawen iti opisina ni Mayor Edgardo S. Cobangbang, Jr.

Inawat dagiti agtutubo ti tsekeda manipud kada Hagad, ken ni Mayor Cobangbang, kas katukad ti panagtrabahoda iti babaen ti Special Program for the Employment of Students (SPES) nga inggannuat ti DOLE-Ilocos Sur ken iti pannakikammayet ti lokal a gobierno ditoy nga ili.

Nagtrabaho dagitoy nga agad-adal iti nadumaduma nga opisina iti munisipio iti las-ud ti makabulan ket immawatda iti saan a nababbaba ngem iti agdama a minimum wage iti rehion.

Iti babaen ti RA 7323 wenno SPES Law, ibaklay dagiti participating partners ti 60% iti sueldo dagiti agtrabaho nga estudiante idinto nga ibaklay ti DOLE ti balanse babaen ti education vouchers.#

Comments are closed.