Footer

Pag-asa Sinait, Laoag, pagpalawagen ti sangguniang panlalawigan maigapu inwaragawagda di umisu senial ti bagyo

VIGAN CITY – Paayaban ti sangguniang panlalawigan dagiti personnel ti Pagasa Sinait ken Laoag City tapno agpalawagda mainaig iti mapapati a palso a pagsinialan ti bagyo nga inwaragawagda iti isasangbay ni Bagyo Mario ditoy probinsia idi rabii ti Septiembre 19.

Inlungalong daytoy ni Bokal Constante Oandasan agsipud iti kadakkel ti damage a sinagrap ti probinsia iti benneg ti agrikultura ken inprastruktura iti panangbasnot ni Bagyo Mario iti Ilocos Sur.

Immun-una ngem daytoy, indeklara ni Gov. Ryan Singson nga under state of calamity ti Ilocos Sur tapno maaramat ti calamity fund para iti relief operations kadagiti nadidigra iti bagyo.

Imbilin pay ti gobernador nga awan ti klase iti amin a level ken opisina idi Septiembre 22 gapu iti dakkel a didigra nga insangbay ni Bagyo Mario.

Bimmulod pay ni Singson iti helicopter manipud ken ni Senator Cynthia Villar tapno maaramat a pangidanon kadagiti relief goods iti Sugpon a naireport nga isolated gapu iti landslide ken layus.

Simmurot pay dagiti medical teams para iti pannakataming dagiti naireport a masaksakit iti nasao nga ili.

Napan metten dagiti truck ti probinsia kadagiti nadumaduma nga ili a pakaibilangan dagiti upland municipalities kas iti Suyo, Sigay ken Del Pilar tapno maiwaras dagiti relief goods.

Nababalaw ti Pagasa iti Sinait, Ilocos Sur ken Laoag City, Ilocos Norte gapu iti mapapati a saan nga umisu a waragawagda iti kapigsa ti Bagyo Mario.

Typhoon Signal No. 1 laeng ti naiwaragawag a pagsenialan ti bagyo iti Ilocos Sur ngem kas maibatay iti kapigsa ti angin ken kakuyogna a tudo, naipababaen koma ti probinsia iti nangatngato a pagsinialan.

Gapu iti volume ti danum nga imbuyat ti bagyo, nalayus dagiti nadumaduma nga ili a pakaibilangan dagiti coastal barangays iti Santa, junction ti Narvacan, dadduma a paset ti Sta. Maria ken Candon City ken dadduma pay a nababa a lugar a puon ti saan a pannakalasat dagiti agbiahe a luglugan.

Kakaruan ti nadidigra ti benneg ti agrikultura gapu iti pannakatinep dagiti kataltalonan ken pannakaisualit dagiti agdawan a pagay ken pannakawagwag dagiti mabalinen a maani a kapagayan.
Naireport a tallo a balay iti maysa a coastal barangay idiay Santa ti natinnag iti karayan idinto nga agbibitin ti dua pay gapu iti pannakakarakar iti teppang ti karayan iti panagdinakkel ti danum.

Nagpukaw ti koriente iti sibubukel a probinsia idi rabii ti Septiembre 19 gapu iti pannakatuang dagiti poste ken pannakapugsat dagiti barut ti koriente.

Dua aldaw nga awan ti koriente iti Vigan City. Nupay kasta, nagadda met la iti koriente kalpasan ti dua nga aldaw.#

Comments are closed.