Footer

Sinursuran: Tarabayen dagiti Ubbing

Kolum ni Jobert M. Pacnis
(Maudi a paset)

Ngem no maminsan, adda a talaga dagiti adalan a di mangikankano. Tuleng. Bastos, ken sutil. Gapu ta tao laeng met ni mannursuro, adda pagpatinggaan ti pasensia/anusna (nupay di koma rumbeng iti kas kenkuana). Ngem kalpasan dayta nga inaramid ti mannursuro, makarikna iti panagbabawi. Ammona a di maikanatad ti inaramidna.

But the damage is done. Isu nga ania pay, sanguenna ti bunga ti inaramidna. Nasayaat laeng no mannakaawat dagiti nagannak ti ubing a biktima ti pannakagsaten ti pasensiana.

Nasayaat dayta maestra ta pakaisuruanna, no kasta ti makadanon a feedback, anian a nagimbag. Ngem manmanon dagita kasta a nagannak. Adu ti kunsintidor.

ITAY kallabes, maysa manen a naranga koma a masakbayan ti napungtil. Iti pannakaipatli ti maysa nga agtutubo gapu iti hazing, nariing manen ti kinapudno a nupay adda dagiti linteg a mangipawil itoy nga aramid, adda latta a kinapudno a mapaspasamak daytoy.

Iti uneg ti pagadalan, wen, napateg dayta panagkakadua — ti adda gayyemna. Iti pannakikadua, maaramid dagiti banag a narigat nga ipatungpal a maymaysa. No man is an island, kanayon a masao. Dakkel a katulongan dagitoy a gagayyem iti pananglasat kadagiti parikut a sumangbay ken mabalin a sangsanguen iti agdama. Nalawag ngarud nga iti pannakigayyem, pannakisali iti maysa a grupo, mamuli met ti kinatao.

Ngem iti pannakamuli ti kinatao, rumbeng koma laeng nga iti kinaimbag ti pagtungedan. Saan ket a makigayyem, makibarkada, makikadua kadagiti mangisungsong laeng iti “nasipnget a pagbanagan.” Iti taray ti gimong ti agdama, adu dagiti sidadaan a mangsimbalud iti maysa nga arapaap. Dagitoy ti maitutop a pakaisentroan ti imatang dagiti nagannak tapno agbanag iti napintas a masakbayan dagiti annakda.

Maibalakad ngarud a maaddaan koma ti panawen dagiti nagannak kadagiti annakda. Iti panangipakita, panangiparikna iti ayat kadagitoy nga annak, saan nga adayo a mausarda daytoy iti inaldaw-aldaw a panagbiagda. Agbalin a natibker kadagiti masagangna a parikut, pakasuotan.

Maipalagip la ket ngarud ti napasamak itay Hulio ditoy ilimi. Maysa a masirib nga ubing iti hayskul ti kellaat lattan a nanggudas iti bukodna a biag. Makibalbalubal daytoy iti top 5 ken kameng pay iti Science class. Nagadu ngarud ti umap-apal kadagiti nagannak kenkuana ta naparaburanda iti masirib nga anak.

Ngem naklaat laengen ti pagadalanna, kangrunaan ti pamiliana, idi maysa daytoyen a nalamiis a bangkay. Nakitada a nagbekkel iti kuartona.

Makagapu? Adda agkuna a kinemkemna dagiti parikutna ta awan ti inana (adda nga agpatpatagabo iti ballasiw-taaw) a pangiyarungainganna ti/dagiti parikutna. Saanna met a kaungnguan unay ti amana—ta mabalin a maalana ti agbain, a kanayon a mapan agpasada iti traysikel. Di panangdadael ngem makainom met no dadduma.

Permi a liday ti inana a nagawid ta naawan aniamanna dagiti panagrigrigatna iti ballasiw-taaw. Bugbugtong pay met ngarud nga anakda ti nasao a biktima.

Dagiti ubbing/agtutubo ti namnama ti pagilian, naminsan a nakuna ni Rizal. Maitutop la unay a bantayantayo ti masakbayanda. Kayattayo man wenno saan, isudanto ti sumaruno kadagiti tugottayo. Isudanto ti mangrienda iti pagilian, ti pagtaklinan wenno pagkamangantayo. Ngem no saanda a natenneb kadagiti napintas a sursuro, ania ngarud ti namnamaentayo a pagbanaganda?

Para iti naranga a masakbayan dagitoy nga ubbing, dakkel ti akemtayo amin— saan laeng a dagiti nagannak ken mannursuroda, no di ket datayo a makapulpulapolda. Aramidentayo koma ngarud dagiti adda kadatayo tapno matulongantay’ ida— saan a mangbiktima kadakuada. #

Comments are closed.