Footer

Tricycle driver, binagkong ti tanod

CANDON CITY – Naiyospital ti maysa nga agpaspasada iti traysikel gapu iti panangbagsol kenkuana ti barangay tanod bayat ti panagiinomda sadiay Barangay San Pedro ditoy siudad idi rabii ti Septiembre 24.
Nabigbig ti biktima a ni Reynold Dapitan y Palaso, 46, naasawaan, ken residente iti Barangay Talogtog, Candon City idinto a nainaganan ti suspek a ni Nicanor Taguro y Mangay-ayam, 47, naasawaan, barangay tanod iti San Antonio, Candon City, Ilocos Sur.

Iti panagimbestiga dagiti polis, bayat ti panaggiinom dagiti dua agraman iti sumagmamano a kakaduada iti Bonzon residence, nagsubangda ket kellaat a binagsol ni Taguro ni Dapitan a nagsagrapan ti naud-udi kadagiti sugatna iti barukongna ken garumiad iti rupana.

Intaray dagiti kakaduada ti biktima idinto a natiliw dagiti polis ni Taguro iti balay ni Barangay Captain Lerma Balaque.

Narekobre dagiti polis ti armas nga inaramat ni Taguro iti nakapasamakan ti pammagsol.#

Comments are closed.