Footer

Umad-adu bilang ti baka a kinapet ti ephemeral disease

CAOAYAN, Ilocos Sur – Manipud iti Enero daytoy a tawen agingga iti Septiembre, nasuroken a 40 a dingnguen a baka ti nagsakit iti ephemeral disease, daytoy ti naammuan manipud iti opisina ti livestock inspector ditoy nga ili itay nabiit.

Kinuna ni Livestock Inspector Oswald Tongson nga adda latta dagiti mairepreport kenkuana a baka nga agsakit iti ephemeral disease wenno trangkaso a maitudtudo nga epekto ti panagbaliw ti klima.

Indagadag ni Tongson ti dagus a panangipakaammo dagiti mannalon no agsakit ti tarakenda a baka iti ephemeral disease tapno masigud a maipakatan iti agas.

Maysa a virus ti makagapu iti bovine ephemeral disease ket no kinapetna ti animal, makita dagiti simtoma kas iti panagtigerger, panagsakit ti susuop ti baka, panagsisikkilna, ken dina unay panagngatingat.

No saan a masigud a maagasan dagiti baka nga agsakit iti ephemeral disease, bumaba ti produksionna ken agtungpal daytoy iti pannakatay ti animal.#