Footer

Vigan, napili a pakaipasdekan ti Abra River Weather Forecasting Center

VIGAN CITY – Napili daytoy siudad a pakaipasdekan ti proyekto ti Department of Science and Technology-Pagasa nga Abra River Flood Forecasting and Warning Center.

Inaprobaran ti konseho ditoy siudad iti maikatlo ken pinal a pannakaibasana daytoy nga insaang ni Konsehal Carlo Medina mainaig iti pannakaipatakder ti nasao a proyekto ti DOST-Pagasa.

Kinuna met ni Vice Mayor Lourdes Baquiran a makatulong daytoy a proyekto iti pannakaballaag dagiti umili maipapan iti kasasaad ti Abra River nangruna iti tiempo ti bagyo wenno dakes a panawen a makagapu iti panagdinakkel ti danum tapno makapagsaganada iti sumangbay a layus.

Kinuna ti bise mayor a mabalin a maipatakder ti nasao a center iti Barangay Ayusan.

Itay nabiit, imballaag ni DILG Provincial Officer Federico Bitonio nga agpeggad a malayus ti Vigan City ken dagiti kaparangetna nga ili a pakaibilangan ti Caoayan, Bantay, ken Santa iti panagdinakkel ti danum iti Abra River no adda sumangbay a napigsa a bagyo gapu iti pannakakalbo dagiti kabambantayan.