Footer

2 pammaltog, naisayangkat iti umuna a lawas ti Nobiembre

STA. CRUZ, Ilocos Sur – Saan pay nga ammo ti kinasiasino ken motibo dagiti nangpapatay iti maysa a mannalon sadiay Barangay Sagat ditoy nga ili idi rabii ti Nobiembre 6.

Ngem kinuna ti kapolisan ditoy nga agtultuloy ti panagimbestigada tapno maammuan ti kinasiasino dagiti nanggudas ken ni Alexander Reyes y Castro, 37, naasawaan, mannalon ken residente iti nadakamat a barangay.

Segun iti inisial a panagimbestiga dagiti polis, magmagna ni Reyes bayat ti panagturongna iti barangay hall ket idi makadanon iti pagbasketbolan, pinaltogan dagiti di nabigbig a suspek a nagsagrapanna kadagiti sugat iti nadumaduma a paset ti bagina a puon ti nakatayanna a dagus.

Naglibas dagiti kriminal iti saan nga ammo a direksion kalpasan ti panangpaltogda iti biktima.

Nakarekobre dagiti inbestigador iti crime scene iti walo a kapsula ken dua nga slug para iti cal. 45 ken maysa a balisong iti ikut ti biktima.

Daytoy ti maikadua a pammaltog ditoy nga ili iti umuna a lawas ti Nobiembre.

Idi agarup 11:45 ti aldaw ti Nobiembre 3, napaltogan ni Pablo Cabradilla y Cabradilla, 45, naasawaan, tricycle driver, ken residente iti Barangay Pilar ditoy nga ili ngem saan a napuruan ken nakalemmeng.

Iti panagimbestiga ti polis, magmagna ni Cabradilla iti barangay road nga aggawid iti balayda idi kellaat a pinaltogan ti dua a di nabigbig a lalaki.
Timmaray ni Cabradilla ngem kinamat dagiti suspek.

Nakapaglemmeng ni Cabradilla iti balay ni George Callejo, Sr. a kabagianna.

Naglibas dagiti suspek iti saan nga ammo a direksion.

Nupay nadaplisan laeng ti makannigid a ramay ni Cabradilla, impanda iti Sta. Lucia District Hospital tapno maagasan.

Nakasarak dagiti inbestigador iti lima a kapsula a mapapati a naggapu iti cal. 45 ken maysa a nakuppil a buli iti nakapasamakan ti pammaltog.

Agtultuloy ti inbestigasion mainaig iti nasao a pammaltog.#