Footer

Droga, nadumaduma a bala, nakumpiska iti search operation

SINAIT, Ilocos Sur – Droga, drug paraphernalia ken pinulpullo a bala para iti nadumaduma a kalibre ti paltog ti kinumpiska dagiti nagtitipon nga elemento ti kapolisan iti pagtaengan ti maysa a drug personality ditoy nga ili idi agsapa ti Nobiembre 6.

Sinukisok dagiti nagtitipon a personnel ti ISPAIDSOTG, PDEA ISSET, ISPPSC, PIB, Sinait Municipal Police Station ken Cabugao Police Station ti balay ken arubayan ni Adrienne Allison Valenzuela y Ines, 23, awanan asawa, ken residente iti Barangay Rang-ay ditoy nga ili ket nakakumpiskada iti maysa a bassit a plastic sachet a nagkarga iti mapapati a shabu; nakuppil nga aluminum foil; 13 live ammunition para cal. 45; 5 live ammunitions para cal. 357; 3 live ammunitions para cal. 32; 2 live ammunition para cal. 22 (short); maysa a live ammunition para cal. 22 (long); 10 empty shells para cal. 22; 4 empty shells para cal. 45; maysa nga empty shell para cal. 22 (long); maysa a deformed slug para cal. 22; ken 5 live ammunition para cal. 22.

Imet dagiti operatiba ti search warrant nga inyisio ni Judge Marita B. Balloguing ti Regional Trial Court, Branch 20, Vigan City, idi insayangkatda ti panagsukisok iti balay ni Valenzuela a sinaksian dagiti barangay officials, kameng ti media ken pannakabagi manipud iti Department of Justice.

Naipan dagiti nakumpiska ken ti suspek iti Sinait police station para iti dokumentasion ken umisu a disposision.#