Footer

Indian community, nagidonar electric fans

VIGAN CITY – Sangagasut a bentilador ti indonar ti Indian community iti provincial government ken iti city government ti Vigan kas paset ti panangselebrarda iti panagkasangay ti diosenda idi Nobiembre 6.

Mismo a da Governor Ryan Singson ken ni Vigan City Mayor Eva Marie S. Medina ti nangawat kadagiti bentilador nga indonar ti Indian community bayat iti programa a naangay iti temploda ditoy siudad.

Sag-limapulo a bentilador ti indonar ti Indian community iti provincial government ken iti Vigan City.

Iti panagyamanna, dinayaw ni Singson ti kinamannakitinnulong ti Indian community idinto a dinakamatna nga uray idi bise mayor pay, tumultulongen dagitoy kadagiti programa iti gobierno ti Siudad ti Vigan.

Impasingked ni Singson a natalged ti panagindeg dagiti Indian national iti komunidadda.

Kinuna met ni Medina nga idi kanikapito a tawen, manipud iti Bantay a naggigiananda, immalis dagiti Indian national iti Siudad ti Vigan ket timmulongda a nangpadur-as iti ekonomia ditoy.

Innayonna nga iti pannakaipasdek ti komunidad dagiti Indian iti siudad, maysa daytoy a pammaneknek a World Heritage City ti Vigan a resrespetuen dagiti agindeg aniaman a kultura.#