Footer

Koleksion ti naglakuan iti gasolina, nakurimes

VIGAN CITY – Agbalbalaw dagiti empleado iti maysa a paggasolinaan ditoy siudad no apay nga agkurkurang ti koleksion dagiti gasoline boy manipud iti paglakuanda.

Ngem idi Nobiembre 4, kimmaron ti suspetsa ti manedier agsipud ta nasurok metten a P4,000.00 ti kurang ti koleksion dagiti gasoline boy.

Naduktalanda ti gapuna: adda gayam nalimed a mangkurkurimes iti naglakuanda a saanda a nasipsiputan iti kallabes.

Idi agarup 4:30 ti malem ti Nobiembre 4, nakaawat ti Vigan City Police Station iti telephone call manipud ken ni SPO2 Rolly Tabuso Tactac, duty personnel iti Vigan City Public Market, nga adda napasamak a panagtakaw iti Caltex Gasoline Station a masarakan iti Barangay I a kukua ken imatmatonan ni Vivian Charity Mendoza y Rondaris, 37, awanan asawa ken residente iti Barangay III, Vigan City.

Kas inrekord ti Closed Circuit Television (CCTV) a nainstolar iti gasoline station, idi agarup 9:30 ti bigat ti nadakamat a petsa, maysa a di nabigbig a lalaki a nakaaruat iti camouflage a short pant, natisirt iti berde, ken nagaruat iti amarilio a bull cap ti nangkaut iti koleksion dagiti gasoline boy manipud iti naglakuanda iti gasolina a naikabil iti cash box a naiparabaw iti lamisaan.

Kinuna ni Police Investigator Chester Dandin a salisi ti modus operandi ti suspek: kabayatan ti panangkarkarga dagiti gasoline boy iti gasolina dagiti lugan, ginundawayanna ti kimmaut iti cash box.

Nagnagna ti suspek a pimmanaw, segun iti footage ti CCTV.

Nupay saan a nalawag ti CCTV footage, kinuna ni Dandin nga addan pangrugianda nga agimbestiga para iti pannakatiliw iti suspek.

Innayon ti inbestigador a rebioenna pay dagiti immun-una a rekord agsipud ta patienda a saan laeng a dayta a gundaway a nagtakaw ti suspek iti gasolinaan.#