Footer

Simbaan, saan a naglako iti holy water: Fr. Avila

VIGAN CITY – Saan a naglako ti parokia ditoy siudad iti holy water a naaramat iti pannakawaris dagiti tanem idi Piesta ti Minatay, kinuna ni Fr. Vicente Avila, kura paroko ditoy siudad.

Inlawlawag daytoy ni Fr. Avila iti sanguanan dagiti pammabalaw a naglako ti simbaan iti container a pakaikabilan iti holy water a naiwaris kadagiti tanem.

Maysa a Ligaya a mapapati a taga-konbento iti Vigan ti nadakdakamat a naglako iti container nga agpateg iti P40.00 idi kaaldawan ti Piesta ti Minatay.

Ngem kinuna ni Fr. Avila a negosio dayta ni Ligaya, saan ketdi a ti simbaan idinto nga innayonna a saan met nga inkapilitan ti igagatang dagiti tao iti nasao a container.

Ngem inyunay-unay ni Fr. Avila a maikkan koma ti holy water iti dignidad ket saan laeng a komporme la ditan ti pakaikabilanna, kas iti nagawangan a shampoo wenno dadduma pay a nagbasioan.

Kinuna pay ni Fr. Avila nga idi 1990s, nagaget nga agwaris dagiti padi kadagiti tanem ngem naikkat daytoy agsipud ta ipakpakitana ti dakkel a baet ti nabaknang ken napanglaw.

“…Nagalas ti kitana daydiay ta makitam lattan ti nabaknang ken napanglaw,” kinuna ni Fr. Avila bayat ti interbio kenkuana ni Jun Ramos, anchorman iti Barangay Commando Brigada a naipatangatang iti DWRS.

Segun iti padi, makantaan ti tanem dagiti nabaknang bayat pannakawarisda idinto a rekada laeng kadagiti napanglaw.

“Isu a naikkat dagidiay ta agbalin metten a komersio,” kinuna ni Fr. Avila.

Kinuna ni Fr. Avila a saan laeng nga aramid dagiti padi ti pannakabendision dagiti minatay no di aramid ti amin.

Kinuna pay ni Fr. Avila nga adda koma holy water iti pagtaengan amin a katoliko tapno adda maaramat a pangbendision iti dakes nga espiritu.

Kinuna ni Fr. Avila nga idi Nobiembre 1 ken 2, nawaya dagiti tattao a mapan agala iti holy water.#

Comments are closed.