Footer

Ti Nalimed a Lalaki iti Biag ni Misis Lilibeth Artates

Sarita ni Salvador A. Espejo
Maikatlo a paset

“Kasano a naammuam amin dagitoy?” nasdaaw ni Rick.

“Padre, iti propesiontayo, kasapulan nga ammotayo ti mapaspasamak kadagiti agop-opisina iti pasdektayo,” kinuna ni dela Cruz.

“Ammom ti pagdagusan ita ni Andy?”

“Damagko nga addada iti kasera ti modista. Bay-am ta pausisak. Itawagkonto kenka.”

“Agyamanak, padre,” kinuna ni Rick. Tinapikna ti abaga ni dela Cruz ket pimmanawen.

Nagsubli iti opisinana. Nagtelepono ken ni David Artates.

“Nadakamatmo a taga-Ilokos ni Misis Artates,” kinuna ni Rick. “Ania nga ili, Mr. Artates?”

“Apay? Nasken kadi iti panagimbestigam?” sinaludsod ni Artates.

“Background check, Mr. Artates. Mabalin a makatulong iti panagimbestigami.”

“Bantay, Ilocos Sur. Diak kabisado ti barangay.”

“Umdasen dayta a pangrugianmi. Nakaam-ammuam ken ni misis?”

“Kasosiok ti amana iti negosio. Pasaray ikuyogna no adda pasken iti opisinami.”

“Agsosiokayo pay agingga ita?”

“Nabangkrap ti impasdekmi a negosio. Bad investment. Nakautang pay kaniak ni Jaime Antolin iti dakkel a kantidad. Nupay kasta, pinakawankon ti utangna. Maymaysakamin a pamilia.”

“Pakabirokak ken ni Mr. Antolin?”

“Pimmusayen. To be exact, dua a tawenen ken tallo a bulan ti napalabas.”

“Agyamanak iti impormasion nga intedmo, Mr. Artates,” kinuna ni Rick. “Tumawagakto no adda developments.”

“Tawagannak iti opisinak iti nagbaetan ti alas tres, ken alas kuatro. Dinak tawagan iti balay. Diak kayat nga agsuspetsa ni Lilibeth.”

“Malagipko ketdi,” binaliwan ni Rick ti saritaan. “Pakabirokak ken ni Andy? Adda koma saludsodek kenkuana.”

Kellaat a nagturay ti ulimek.

“Mr. Mijares, diak kayat a mairamraman ni Andy iti problemami ken ni misis,” nabannayat ngem nadagsen ti balikas ni Artates.

“OKey, no dayta ti kayatmo, Mr. Artates,” insungbat ni Rick.

“Isentrom ti panagimbestigam ken ni misisko, nalawag?” intupak ni Artates ti auditibo ket uray la natitileng ni Rick.

Naapiras ni Rick ti timidna idinto a namulenglenganna ti telepono. Ania koma ti pakasairan ni Artates? Immuneg ti kuretret iti mugingna. Iti damo a panagkita, kasla simple laeng a panagimbestiga ti inawatna a trabaho. Ngem ita, panagriknana, kumplikado ti naserkanna a kasapulan iti naun-uneg a panagimbestiga.

Dina magustuan dagiti pakpakauna a naammuanna. Napatalgedan ti inkissiim kenkuana ni dela Cruz a kaarig bayad-utang ti pannakatagikua ni Mr. Artates iti asawana. Posible a linipit ni Mr. Artates ti kinasosiona nga ama ni Lilibeth iti utang daytoy ket nagsakripisio ni Lilibeth tapno maallangonna ti dayaw ti amana. No kastoy ti ramut ti pannakaasawa ni Mr. Artates ken ni Lilibeth, saan ngarud a solido ti pundasion ti kasarda.

Inayaban ni Rick ni Dollie. Binilinna ti sekretariana nga ipatulodna ti retrato ni Lilibeth Castro babaen ti e-mail ken ni Rudy Quespo iti Vigan City. Kabarkadana ni Quespo idi agbasbasada iti Criminology. Kas kenkuana, nangipasdek ni Quespo iti bukodna nga investigation agency iti Vigan City.

Inted ni Rick ken ni Dollie ti numero ti selpon ni Quespo. Classified ti numero ni Quespo. Manmano ti makaammo iti numerona.

“Ipakaammom a dagus kaniak apaman a makontakmo,” kinuna ni Rick.

“Pagbiit laeng, sir,” insungbat ni Dollie.

Madamdama, nagwengweng ti intercom. Imbaga ni Dollie nga addan iti linia ni Quespo.

“Ita man a nakalagipka, lakay,” kinuna ni Quespo. “Trabaho kadi?”

“Kasla makitkitak a nagbistrad ti agongmo a nakasaep iti kliente, padre,” inyangaw ni Rick.

“Am-ammoka manipud ulo agingga iti dapan, Rick Mijares,” kinuna ni Quespo. “Saanka a tumawag kaniak no awan ti masapulmo. Okey, ibagamon.”

“Ni Lilibeth Castro Artates dayta impatulodmi a retrato,” kinuna ni Rick. “Taga-Bantay, Ilocos Sur. Kayatko a maammuan no sino dagiti barkadana a lalaki, ti nakaayan-ayatna dita. Uray ania a masagapmo a tsismis maipapan kenkuana, ireportmo kaniak.”

“No big deal. Naglapsat a babai, siguraduek a saannak a marigatan nga agpalutpot.”

“Tawagannak a dagus no adda maduktalam nga importante, okey?”

“Namnamaem, padre, aglalo no napuskol ti itangdanmo kaniak,” kinuna ni Quespo.

“Dika madanagan, padre,” impatalged ni Rick. “Nabagas ti ipaapirasko kenka no magustuak ti maduktalam.”

“Dayta ti magustuak kenka, Rick ta ammom ti agiparabur no malanitan ta boksitmo,” kinuna ni Quespo.

Alas kuatro iti malem idi agreport ni Jojo nga imbaonna a mangpaliiw ken ni Lilibeth Castro.

“Kumusta ti lakadmo?” inamad ni Rick. Iti panangtaldiapna iti rupa ni Jojo, ammona lattan nga awan ti nasayaat nga ipadamag daytoy.

“Malas,” insungbat ni Jojo idinto nga impusotna ti bagina iti nalamuyot a tugaw iti sanguanan ti lamisaan ni Rick.

“Kayatmo a sawen, inyaw-awannaka?”

“Nasiglat daydiay a babai,” nagsakuntip ni Jojo. “Sinikapannak!”

(Maituloyto)

Comments are closed.