Footer

Trailer truck, dimmungpar iti poste, alad

CABUGAO, Ilocos Sur – Nagsagrap ti maysa a trailer truck kadagiti nakaro a dadael gapu iti panangdungparna iti poste ti PLDT ken ti kongkreto nga alad sadiay Barangay Bonifacio, ditoy nga ili idi malem ti Nobiembre 3.

Nupay kasta, saan a nadunor ti drayber ti trailer truck a nainaganan a maysa a Marcelino Galanza Saculpao, 49, naasawaan, ken residente iti Barangay Quimmallogong, Sinait, Ilocos Sur, ken ti pahinantena a di nailanad ti naganna iti blotter.

Iti panagimbestiga dagiti polis, agdaldaliasat nga agpaaabagatan a direksion ti trailer truck a minaneho ni Saculpao ket iti nakaro a pagkurbaan, nagmenor ngem mapapati a napukaw ti lugan ti balansena ket nabaliktuad iti makannawan a pasetna iti makannawan nga abaga ti kalsada.

Mapapati a naguyas ti trailer truck sana dinungpar ti PLDT electric post ken kongkreto nga alad ni Nora Garvida y Vallejo.

Nagkarga ti truck kadagiti sinaksako nga irik nga agdagsen amin iti sumurok kumurang 35 tonelada ket daytoy ti mapapati a nakapukawan ti balansena iti pagkurbaan.#

Comments are closed.