Footer

Warrant of arrest, agur-uray agama a pimmatay iti polis iti iruruarda iti ospital

BANTAY, Ilocos Sur – Agur-uray ti warrant of arrest kadagiti agama a nangpapatay iti maysa a polis iti Barangay Naguiddayan, Bantay idi malem ti Oktubre 6 apaman a rummuarda iti ospital a pakaag-agasanda.

Iti kaudian a report, mabalinen a rummuar iti Metro Vigan Cooperative Hospital da Henolino Sayo y Garcia, 48, ken ti anakna a ni Noriel Sayo y Talania, 23, ngem mapapati nga awan ti pagbayad dagitoy iti pannakayospitalda.

Kinuna ni Bantay Chief of Police Greg Guerrero a naipilan ti kaso maikontra kadagiti agama ken adda payen warrant of arrest a naiyisio para iti pannakaarestoda.

Napilaan dagiti agama iti panaglabsing iti RA 10591. Sabali a kaso a panaglabsing iti Section 12 ti RA 9165 ti naipila maikontra ken ni Henolino Sayo.

Kinuna ti hepe a no ipakatda ti warrant of arrest, matiliwen dagiti suspek sada maipaima iti korte ken maikomitar iti provincial jail.

Pinaltogan dagiti agama ni SPO3 Marcelino Presto, Jr. y Tugade, 41, PNP member a naka-assigned iti San Fernando City Police Station bayat ti igagatang daytoy iti bibingka sadiay Barangay Naguiddayan idi malem ti Oktubre 6.

Nupay nasugatan, nabaelan ni Presto ti nakipinnaltog kadagiti agama a nakasugatan met dagitoy.

Kinamat dagiti nagresponde a polis dagiti suspek a naglibas a nakalugan iti motorsikloda ket natiliw dagitoy kalpasan a naikras ti luganda a napasapgidan iti patrol car dagiti polis.

Nakarekobre dagiti polis iti maysa a cal. 45 pistol a nagmarka iti Remington nga addaan serial number 101268 nga addaan dua a short magazines ken 2 a bala ken maysa a glass tooter ken maysa a nakuppil a berde a lighter iti ikut dagiti suspek.

Intaray dagiti kameng ti Highway Patrol Group ni Presto iti Metro Vigan Cooperative Hospital ngem pimmusay daytoy gapu kadagiti grabe a sugatna iti nadumaduma a paset ti bagina.

Mapapati a gun for hire dagiti agama.

Kabayatanna, back to square one ti panagimbestiga ti kapolisan kalpasan a saan a nakatulong ti footage ti close circuit television (CCTV) iti pannakaitudo iti kinasiasino dagiti pimmaltog iti maysa a tricycle driver itay agtapus ti bulan ti Oktubre.

Segun iti polis, negatibo ti resulta ti panangamirisda iti footage ti CCTV a naipasdek iti asideg ti sungaban ti rangtay sadiay Barangay Pangada, Sta. Catalina kasta met iti panagsalsaludsodda kadagiti tattao mainaig iti pannakapaltog ni Domingo Frando Domingo y Cajecal, 59, idi malem ti Oktubre 30.

Nakalasaten iti peggad ni Domingo ngem saan pay a makasao gapu iti sugatna iti pangana tapno makaited iti pakalawagan iti pannakagandat iti biagna.

Maipalagip nga agpalaud a direksion ti traysikel a minaneho ni Domingo ket idi makadanon iti amianan a sungaban ti Govantes bridge iti Barangay Pangada, pinalikudan a pinaltogan dagiti suspek a nakalugan iti motorsiklo.

Kinamat dagiti nagresponde a polis dagiti suspek ngem nakalusot dagitoy iti intersection ti highway sadiay Bantay, Ilocos Sur.

Kalibre 45 ti mapapati nga inaramat dagiti suspek a nanggandat iti biag ni Domingo kas maibatay iti deformed slug a nasarakanda iti crime scene.#