Footer

BANNER NEWS: Detachment ti PA, rinaut dagiti kameng ti CNN, 3 soldado nasugatan

STA. CRUZ, Ilocos Sur – Tallo a soldado ti gobierno ti nasugatan bayat ti pannakirangetda a mangsalaknib iti kampoda kadagiti rimmaut a mapapati a kameng ti New People’s Army idi rabii ti Nobiembre 10.

 

Nabigbig dagiti nasugatan a soldado a da Pvt Rey Bajar y Trinidad, Pvt Sam Garote y Baybaya, ken Pvt Jaceth Baluyan y Catalog.

 

Immuna a naitaray dagiti nasugatan a soldado para iti pannakaagas ti sugatda iti Candon City Hospital sada naiyalis iti Fort Magsaysay, Nueva Ecija.

 

Apaman a naawatda ti mensahe, dagus nga immarayat ti Ilocos Sur Police Provincial Office nga indaluan ni Police Senior Supt. Nestor Eswagen Felix, kaduana da Supt. Maximo Almachar Taclas, Chief, PIDMB, Sta. Cruz police station nga indauluan ni COP Chief Inspector Simon G. Damolkis, ken PCLO, Candon Sub Office ket nangisayangkatda iti SOCO iti nakapasamakan ti ranget a nakarekobreanda iti maysa a bala ti M203; maysa a bala ti M14; 21 kapsula manipud iti M16; 19 kapsula manipud iti M14; ken 3 a kapsula manipud iti M203.

 

Naipan dagitoy iti PCLO, Candon City Sub-Office para iti umisu a disposision.

 

Segun iti Sta. Cruz police station, nakaawatda iti mensahe manipud iti maysa a PFC Rolando M. Vallejo ti 81st IB a nakabase iti Barangay Bugbuga ditoy met laeng nga ili, a rinaut ida dagiti mapapati a kameng ti CNN.

 

Segun met ken ni Captain Dexter P. Apsay ti 81st IB, idi agarup 8:15 ti rabii ti nadakamat a petsa, addada iti detachment idi mapapati a rimmaut dagiti kameng ti CNN.

 

Kinuna ni Apsay a nagpaut ti ranget iti sumurok kumurang 30 minutos ngem napaay dagiti rimmaut a nangrubbuot iti kampo ket naglibasda idi agarup 8:45 iti dayta met laeng a rabii.

 

Saan a nailanad iti report ti bilang dagiti rimmaut ken no adda met nasugatan kadakuada.

 

Dagus a nangiwayat ti kapolisan ti Santa Cruz iti dragnet operation ken nangipasdekda kadagiti checkpoint sadiay Barangay Saoat, Poblacion Este ken Sidaoen a posible a lumsotan dagiti rimmaut a kabusor ti turay.

 

Nakikoordinarda pay iti kabangibangda a police station, RPSB ken PPSC tapno mangiwayatda met iti checkpoint ken reinforcement kadagiti naraut a soldado.

 

Iti pannakaisurat daytoy, agtultuloy ti hot pursuit operation ti 81st IB, Philippine Army idinto a naiyalisen dagiti nasugatan a soldado iti AFPMC, Quezon City.#

Comments are closed.