Footer

Endangered species a kayo, indagadag ni Vice Governor DV a mapaadu

SAN JUAN, Ilocos Sur – Indagadag ni Vice Governor Deogracias Victor Savellano ti pannakapaadu dagiti kayo nga agpeggad a mapukaw iti probinsia ti Ilocos Sur.

Kinuna ni Savellano a mapukpukawen iti probinsia ti logo, anonang, bittaog, tiesa, kamantiris, makopa, ken dadduma pay a kadaanan a mula wenno kayo.

Maysa pay nga endangered a kayo a kayat ni Savellano ti mapaadu ti sagat, maysa a kayo a natangtangken pay ngem narra a napintas nga aramiden a muebles.

Kinuna ni Savellano nga inusanda a ginabut dagiti mula a sagat a nagrusing iti arubayan daytoy a kayo sada inmula iti lote iti Barangay Pug-os.

Kinuna ti bise gobernador nga amin a kadaanan a mula a maalana, pinaimulana iti BArangay demo farm tapno makapataudda iti bukel a maiwaras a maimula iti probinsia.

Innayon ni Savellano nga endangered species dagitoy a kayo ket no saan nga agtignay ti gobierno probinsial, naan-anayton a mapukawda.#