Footer

Gubat latta sipud pay idi

Sinurat ni Jose Ed. Sajonia
(Maudi iti dua a paset)

Itatta, no adda simparat iti nagbaetan ti dua a nasion, agpinnademdemda ket mapasamak ti panagpinnastidiar agingga a maisugmek ti ekonomia ken agagal ti tattao! Napia dagiti dadaulo ta adda reserbada a kiraosenda no umay ti nakaro a suppiat.

Kuna dagiti agpalpaliiw a saan a maliklikan ti gubat ta uray pay a mismo iti biang dagiti agkakadaraan ket agrurupakda pay! Ti di mabilang a gerra-sibil a napasamaken iti las-ud dagiti dadakkel a nasion ket saan a mailadawan ti damsak nga imbungana agingga a nagplastarda manen.

Kabayatanna, mapasamak met ti gubat iti las-ud ti naespirituan a benneg. Iti Historia, napasamak ti ag-100 a tawen a gubgubat dagiti mangipagpagna ti doktrina ti katolisismo ken protestantismo iti Europa. Napasamak daytoy idi 1547-1648 a masasao a reformation period. Pattopattok ti nakapasamakan daytoy a gubat ngem isu la nga isu ti makagapu. Kadawelan ken kakaruan ti deretso nga awan ti ressatna a 30 anios a panaggubat ti pasurot dagitoy a pammati. Nupay naglatak ditoy da Martin Luther King, John Calvin ken dadduma pay a nalalatak a religious reformers, naikompromiso ti biagda ta nalaokan ngamin iti rangranget dagitoy a panagrisiris ti pampammatida! Kadagita a panawen, saan pay la nga ammo ti kuskusto a pagluglugaran ti tao iti pagtakderanna a pammati ket nupay agtultuloy latta ti panagtulid ti biag ken panagadu ti tao, no ar-arigen, agbiag ti kakaradkadan kadagita a situasion!
Kanaig daytoy, simmangkautro met ti damsak nga imbunga ti masasao a gubat ti Crusades (Kristiano) kontra Jihadists (Islam) iti panangpasublida ti Holy Sepulcher iti Jerusalem idi 1095-1212 a siglo. Ditoy ti nangipamatmatan dagiti Muslim iti tibker ken andurda iti gubat ta narigatda a mapadso. Sakbayna, kinabaelanda pay ti nagipatakder iti imperioda babaen iti panangsakupda babaen ti gubgubat dagiti nagduduma a nasion ti Middle East ken Europa ta nabibilegda met a mannakigubat.

No sumadaen ti natay a tao ken nadadael a sanikua iti amin a gubgubat nanipud idi ugma ket mabannogka a mangkontar. Segun iti historia, dagiti sumaganad laeng ti pinarnuay ti damsak ti World War 1 ken World War II:

World War I – Nairaman iti gubat –37,494,186; natay a tao – 8,538,315; nasugatan a tao – 21,219,452; nagpukaw a tao (di nabirokanen) – 7,750,990!; war osts – $186,000,000,000.

World War II – Nairaman iti gubat – 50,000,000 – 21 miliones a soldado ken 29 miliones a sibilian; Dagup ti balor ti nadadael a sanikua – $1,384,000,000,000.

Dagiti epekto ti gubat: nakana a ladingit, pannakabalo ken pannakaulila!

‘Iti laksid daytoy makabibineg a kinapudno, apay a kayat latta ti tao a kas maudi a kamangna no adda saan a marisut a problema ti indibidual, grupo ken sangkataw-an? Umdas koman ti immuna a gubat a nagibasaran ngem awan ti nagnaan dagitoy a pakdaar no di ket nagbalin nga ilut ken masahe ti sangaparsuaan iti makapadas ti gubat! Narangranggas pay ti maikadua a gubat ket am-amang pay ngata a narangranggas ti sumaruno a gubat, yad-adayom, Apo, ti maminriwriw ta awan ngatan ti makalasat ket no adda man: kaykayatna ngata ti agbiag pay a baldado, paralisado wenno lukmo, yad-adayom, Lord! #

Comments are closed.