Footer

Mannurot: Pulitika!

Kolum ni Danny Antalan

Maysa a klasiko a kita ti pulitika ti mapaspasamak ita iti pagiliantayo. Ti kayatko a sawen ket ti agtultuloy nga imbestigasion ken ni Bise Presidente Jejomar Binay nga adda panggepna a tumaray a para presidente iti eleksion iti tawen 2016.

Saan nga adayo ti mangisaysayangkat ti imbestigasion, ni senador Alan Peter Cayetano, nga adda met laeng panggepna a tumaray a Presidente. Kadduana a mangisaysayangkat iti imbestigasion ni Senador Antonio Trillanes iti sub-committee ti Blue Ribbon ti Senado.

Natalna met nga agpalpaliiw dagiti dadduma nga agkatangkatang ti naganda kas presidentiables met laeng – da DILG Secretary Mar Roxas, Sen. Ferdinand “Bongbong” Marcos, Sen. Chiz Escudero ken Sen. Grace Poe.

No kunada a masapul a natangken ti sangim a makibinnalubal iti pulitika, isu ti masapul nga aramidem. Ta makalkal amin a napalabasmo nangruna dagiti naglabasam a posible a pagtaudan kadagiti isyo a mangdadael iti pulitikam. Kitaen no kasano katangken ti sangi ni Bise Presidente Binay.

Ti rigatna, saan laeng a bagim ti banbantayam a mabalin a dadaelen dagiti kasupangetmo a pulitiko. No dadduma, ultimo ti pamiliam kas koma ti anakmo wenno asawam ti mairamraman.

No kitkitaen ket saan metten a sabali dagitoy a pasamak. Napaspasamaken dagitoy idin kadagiti nagkakauna a pulitika. Dinnadadael iti kinatao, mangaramat iti impluensia, kuarta, paltog ken sirib.
Malagipko, sakbay a nagsuek idi ni sigud a Senador Manny Villar iti arapaapna kas Presidente, isuna idi ti kapigsaan ken kasla makitkitan ti panagtugawna iti Malakaniang. Kasta la unay ti gagetna idi nga agpasiaren, agdindinnamag ti panangtulongna kadagiti overseas Filipino workers ken panangaramatna iti kinabaknangna tapno ad-adda pay a bumanglo kadagiti Filipino.

Ngem idi mangrugi ti damag maipanggep iti C5 road ken naisayangkat ti hearing iti Blue Ribbon Committee iti Senado, nangrugin ti panagtinnag ti nangato a ratingna iti Social Weather Station (SWS) ken Pulse Asia Survey. Ad-addan a narsaak ti arapaapna ta natay ni sigud a Presidente Corazon Aquino nga isu metten ti panagtayok ti nagan ni Presidente Benigno Simeon Aquino III nga idi ket maysa a senador.

Ita, umay manen ti sabali nga eleksion ta uray la natinnag iti maikatlo a puesto iti eleksion ta inatiw pay ni sigud a Presidente Joseph Estrada.

Ita, umay manen ti sabali nga eleksion. Ngem no ar-arigen, mabayag pay koma ta adda pay dua a tawen sakbay a maangay ti eleksion. Ngem siempre, nasapsapa ti pinnulitika ngem iti pulitika. Kinapudnona, adda bukoden a patalastas dagiti personalidad iti telebision ken radio kadagiti nagan a posible a naaweng iti eleksion.

Nangrugin ti pinnulitika. Siempre, no makitan a nakapuonan ti maysa, rippuogem dayta tapno makaulika met tapno patas laeng ti dangadangyo. Ta no nangato isunan ket addaka iti baba ket baybay-am dayta, dika laengen sumangsango no addaka iti kutitna.

Ti saludsod, agbalin ngata a Villar ni Binay? Maapektaran ngata ti nangato a talek ken ni Binay kadagiti kaso a panagkusit a kas koma ti maim-imbestigaran a parking building iti Makati a maibagbaga a nangato unay ti presiona. Ken ti maibagbaga a Hacienda Binay idiay Batangas nga isu ti maysa kadagiti kabaraan a damdamag ita iti pagilian?

No epekto, adda ngata, ta manipud iti nangato a 81 trust rating ti bise presidente ket nagbalin a nababa. Dakkel unay ti nagtinnaganna. Ngem no ikumpara met kadagiti dadduma a presidentiable, dakkel pay laeng ti baet wenno milia pay laeng ti pangitartarayanna agsipud ta 13 a porsiento ti kaasitgan a ni Mar Roxas.

Ngem ammo met a saan pay nalpas daytoy nga estoria. Adu pay ti mapasamak ken adu pay ti imbestigasion a mapasamak.

Nawatiwat pay ti aldaw sakbay ti Mayo 2016.

Sapay koma ta awan ti maatake.#