Footer

Motorsiklo, napukaw iti garahe ti opisina

BANTAY, Ilocos Sur – Uray mismo a garahe ti pagopisinaan, saan a natalged dagiti maiparking a motorsiklo ditoy.

Nagpulong ni Jayvee Flores y Dumaguin, 23, baro, sales representative iti Lakpue Drugs, Inc. ken residente iti Barangay Cadaclan, San Fernando City, La Union a napukaw ti motorsiklona a black Suzuki Shogun nga imparkingna iti garahe ti opisinada sadiay Barangay Balaleng Centro, Bantay idi malem ti Oktubre 31.

Segun ken ni Flores, kalpasan a naiparkingna ken nakandaduan ti motorsiklo, nagawid, nagreport iti opisinada iti Cubao, Quezon City, sa nagkolekta kadagiti utang dagiti kustomer iti La Unon.

Naduktalanna laengen nga awanen ti motorsiklo iti garahe idi agsubli iti opisinada idi agarup 2:00 ti Nobiemre 10.

Naammuan a saan nga imbilin ti biktima a kitaen ti caretaker iti balay/opisina ti motorsiklo nga imbatina iti garahe.#