Footer

Ti Nalimed a Lalaki iti Biag ni Misis Lilibeth Artates

Sarita ni Salvador A. Espejo
Maikapat a paset
INSALAYSAY ni Jojo ti napasamak. Alas nuebe idi umulog ni Misis Artates iti balayda. Isu ti nagmaneho iti nangisit a kotsena. Immuneg iti Farmer’s Mart. Maysa nga oras iti pagtagilakuan. Idi rummuar, naruay ti karga ti carriage nga isu a mismo ti nagiduron agingga iti asideg ti nakaiparkingan ti kotsena. Naglugan iti kotsena ket deretso iti sanguanan ti Joy’s Garments

Kalpasan ti maysa nga oras, nagbalaw ni Jojo. Simrek iti pagdaitan. Awanen ni Misis Artates! Iti panagusisa ni Jojo, natakuatanna nga adda ruangan iti likudan ti pagdaitan. Dita la ketdi ti nagnaan ni Misis Artates.

Nagsalsaludsod ni Jojo iti pagdaitan no sukida ni Misis Artates. Ngem kinuna ti manedier a dina am-ammo.

“Nasiglat daydiay a babai,” nakuna ni Jojo. “Ammona a libasan ti mangsursurot kenkuana!”

“Ha! Ha! Ha! Ti kunam ketdi ket naglatikan,” insutil Ni Rick. “Nadlawan la ketdi ni Mrs. Artates a sursurotem.”

“Suspetsak a nasanay a kasta ti ar-aramidenna!”

Segun ken ni Joho, alas dos iti malem idi sublien ni Lilibeth ti kotsena. Nagderetso iti balayda. Saanen a rimmuar.

“Awan, naglatikan,” inkantiaw ni Rick. “Inton bigat, agsinnukatta. Sika ti mangtunton no sadino ti pagnaedan ni Robert ket siak met ti mangsurot ken ni Mrs. Artates.”

KINITA ni Rick ti relona. Alas nueben. Nagsakuntip. Awan sa manen ti ganabenna. Tallon nga aldaw a di rimmuar ni Misis Artates.

Pagammuan, immaweng ti selponna. Ni Rudy Quespo.

“Natuntonakon ti pagtaengan da Misis Artates – iti Zone 5, Bantay, Ilocos Sur.”

“Ania pay ti naduktalam?”

“Negosiante ti amana, maysa a Jaime Antolin. Adda kinasosiona dita Manila. Kumpirmaak pay no sino. Ngem nabangkrap ti negosiona. Ammomon no malaokan ti negosio iti sugal ken babai, awan ti pagtungpalanna no di manabtuog.”

“Kasta met ti nadakamat diay assettayo. Nailumlom iti utang ti ama ni Misis Artates. Ngem inalaw ti kasosiona kadagiti nakautanganna.”

“Ha, kasano a naammuam dayta?” nasdaaw ni Quespo.

“Ania pay ti naduktalam?” sinaludsod ketdi ni Rick.

“Pimmusay ni Antolin, agarup tallon a tawen ti napalabas. Nagpasiudad ni Misis Artates ket ditan Manila a nagindeg manipud idi. Saanen a pimmasiar pay ditoy Bantay, Ilocos Sur.”

“Damagko nga adda kaayan-ayatna dita,” kinuna ni Rick.

“Hustoka, padre. Romeo Alabastro ti naganna.”

“Adda pay la komunikasion iti nagbaetanda?”

“Idi damo pay ni Misis Artates iti siudad, nagsursurat ken ni Romeo. Ngem dua a tawen itan nga awanen ti komunikasion iti nagbaetanda.”

“Awanen ti sabali pay a naammuam?”“Pangrugian la dayta, padre. Itay napan a bulan, kellaat a nagpayalis ni Romeo iti pagtrabahuanna. Adda ita dita Manila. Agtrabtrabaho iti maysa a bangko.”

Limtaw ti sawaw a sagawisiw ni Rick. Umun-uneg ti misterio!

“Ammom ti adresna ditoy?”

“Saan. Ngem agtrabtrabaho ita iti Metro Manila Banking Corporation. Madama a kumkumpirmarek no ania a sanga ti MMBC ti pagtrabahuanna.”

“Okay, makaammoakon ditoy. No adda napateg a maduktalam, tawagannak a dagus.”

“Ok, you’re the boss!” kinuna ni Quespo.

Dinagdagus ni Rick nga iniddep ti cell phone idi mataldiapanna a nailukat ti ridaw a kumamang iti minuyongan da David Artates. Rimmuar ti nangisit a kotse. Limmabas iti nakaiparkingan ti lugan ni Rick. Ni Lilibeth Artates ti nagmaneho.

Pinagandar ni Rick ti kotsena ket sinurotna ti nangisit a kotse. Tinaldiapanna ti oras iti pungupunguanna: alas dies iti bigat.

Tinarengteng ti sursurotenna a kotse ti Magallanes. Binay-an ni Rick a simmukot ti dua a lugan iti nagbaetanda tapno di makadlaw ni Misis Artates.

Nagsilaw ti traffic light iti nalabaga. Nanindi ni Rick bayat ti panagurayna iti panagbaliw ti silaw.

Inruarna ti napuskol nga asuk iti agongna.

Nagsindi ti berde a silaw. Pinataray ni Rick ti luganna ta nagpakannigid ti sarsarunuenna a nalabaga a kotse.

Nagsikko ti sursurotenna iti makannawan sana pinanurnor ti Libertad Street. Madamdama, nagmenor ti lugan sa nagparking iti sanguanan ti Farmer’s Supermart. Dimsaag ni Misis Artates ket simrek iti uneg ti pagtagilakuan.

Nagtalangkiaw ni Rick. Awan ti makitana a bakante a pagparkingan. Inlabasna ti kotsena sana impaigid iti sakbay ti krosing.

Dimsaag ni Rick ket nagsubli iti Farmer’s Supermart. Immuneg. Winawananna ni Misis Artates.

Awan a makitana.

Napan iti paglakuan iti nateng. Awan ti sapsapulenna.
Nakaanges iti nalukay idi mataldiapanna ni Misis Artates iti karnean. Adda idurduronna a kararit. Ngem awan pay karga ti carriage.

Adda limmabas a seksi a babai. Nagmayat ti panagindayon ti patongna ket saan a nalapdan ni Rick a di insurot ti panagkitana. Idi kumita iti karnean, awanen ni Misis Artates.

Impalawlawna ti panagkitana amangan no adda laeng daytoy iti asideg. Ngem talaga nga awan.

Linawlawna ti karnean. Awan a makitana ni Misis Artates. Mapan koma iti paglakuan kadagiti delata idi nataldiapanna ti kararit a naipaigid iti sikigan ti ridaw. Arintarayen a rimmuar. Nakitana ti sikigan ni Misis Artates a limmugan iti taksi.

Nataldiapan ni Rick ti sumungad a taksi. Nagsenias sa timmaray a sumabat iti lugan. Ngem kellaat a napukawna ti balansena idi nakadungparna ti maysa a lalaki nga agdardaras a sumrek iti pagtagilakuan.

“Sori, ‘adre, di ko sinasadya,” nagpadispensar ti lalaki.

“Walang anuman, ‘dre,” insungbat ni Rick idinto a nagdardaras nga immasideg iti nagparada a taksi. Ngem addan dua a lalaki a nakauna a limmugan.

Kasla naidarekdek a bambanti ni Rick iti bangketa bayat nga insursurotna ti panagkitana iti likudan ti taksi a nagluganan ni Misis Artates. Nakitemna laengen ti bibigna idi nagsikko ti taksi iti kannawan sa nagpukaw iti imatangna.

(Adda tuloyna)